Aıagózdegi áleýmettik ortalyqtyń búgingi jaǵdaıy qandaı
Byltyrdan beri Aıagóz qalasyndaǵy Balalar arnaıy áleýmettik kómek kórsetý ortalyǵyna túrli organdardan 15 ret tekserý jasalyp, birshama olqylyqtar anyqtalǵan. Qazirgi ýaqytta sol kemshilikter túzeldi me? Mine, dál osy suraqqa jaýap izdeý úshin óńirde qoǵamdyq komıssııa qurylǵan. Onyń quramyna kópbalaly analar, úkimettik emes uıymdar men BAQ ókilderi kirdi. QazAqparat agenttiginiń tilshisi de komıssııa múshesi retinde Aıagóz qalasyna baryp, ortalyqtaǵy jaǵdaıdyń mán-jaıyn anyqtap qaıtqan edi.
Ortalyqtaǵy ońdy ózgerister
Búgingi tańda ortalyqta 96 tárbıelenýshi bar, olardyń 60-tan astamy jetim balalar. Ár balaǵa jasalǵan medıtsınalyq kartaǵa logoped pen salalyq mamandardyń emdeý nátıjeleri udaıy engiziledi. Sonymen qatar dıetologtyń keńesimen tárbıelenýshilerge qajetti kalorııa mólsherin eskere otyryp jeke-jeke mázir qurastyrylǵan.
«Bıyl mekemege 139,5 mln teńge bólindi. Sonyń aıasynda jóndeý jumystary júrgizilip, 2 balalar alańy abattandyryldy. Jańa jabdyqtar men jıhaz alynyp, «bultty» beınebaqylaý júıesi engizildi. 51 kameranyń 44-i ishte, 7-i syrtta», - dedi Balalar arnaıy áleýmettik kómek kórsetý ortalyǵynyń dırektory Sholpan Makasheva.
«Bultty» beınebaqylaý júıesi beınejazabalardy qazirgi ýaqytta kórýge jáne olardy joıý nemese ózgertý múmkindiginsiz 90 kúnge deıin serverde saqtaýǵa múmkindik beredi. Barlyq kelip túsken aqparat bultta saqtalady. Bul aqparattyq qaýipsizdik talaptarynyń buzylýyna jáne derekterdiń taralyp ketýine jol bermeıdi.
Ortalyq ǵımaratyna qosymsha korpýs ta salynbaq. Osy maqsatta 160,5 mln teńge jumsalady. Onyń birinshi ǵımaratynda medbıke bólmesi, em-shara bólmesi, lıft shahtasy jáne balalarǵa arnalǵan 3 palata ornalasady. Al ekinshi qabatta oıyn bólmesi, as úı jáne taǵy 2 palata bolmaq.
Osy rette, tekserister nátıjesinde anyqtalǵan birqatar zańbuzýshylyqtarǵa toqtala ketsek. Epılepsııamen aýyratyn 6 balaǵa zańsyz ekpe jasalypty. Sol úshin terapevt dáriger ákimshilik jaýapkershilikke tartylyp, aıyppul arqalady. Budan bólek, psıhotropty zattardy paıdalaný erejesin buzǵan aǵa medbıkeniń isi Aıagóz aýdandyq sotynda qaraldy. Sot úkimimen QR Qylmystyq Kodeksiniń 303-baby 1-bóligimen kináli dep tanylǵan aıyptalýshy qyzmetinen bosatylyp, 20 AEK mólsherinde aıyppul tóleýge mindettelgen. Órt qaýipsizdigi talaptarynyń buzylý faktileri de tirkelgen bolatyn. Qazir bul kemshilikter tolyqtaı túzetildi.
Koronavırýs juqtyrǵandar joq
«Búginde ortalyqtaǵy balalardyń densaýlyq jaǵdaılary turaqty. Eshkim koronavırýs juqtyrǵan joq. Qyzmetkerler arasynda da qaýipti dertke shaldyqqandar tirkelmegen. Bul qatań karantındik sharalardyń nátıjesi. PTR tapsyrǵan ár qyzmetker osynda 15 kún boıy syrtqa shyqpaı jumys isteıdi. Sosyn olardy kelesi aýysymdaǵylar almastyrady», - dedi Sholpan Makasheva.
Tárbıelenýshiler kúnine 5 ýaqyt tamaqtanady. Azyq-túlik ónimderiniń sapasyna qatań mán beriledi. Búginde ortalyqta 160-qa jýyq adam jumys isteýde. Tárbıeshilerdiń kún tártibi mynadaı:
7.00-7.30 – Balalardy uıqydan oıatý, jýyndyryp-kıindirý.
7.30-8.30 – Tańǵy as.
8.30-9.00 – Em-shara qabyldaýǵa jáne sabaqqa daıyndaý.
9.00-11.00 – Ár balamen jeke jumys (LFK, logoped, defektolog).
11.00-11.30 – Tańerteńgilik dárýmender berý.
12.30-13.00 – Túski as.
13.00-15.00 – Túski demalys (uıyqtatý).
15.30-16.00 – Uıqydan oıatý, tazalyq protsedýrasyn júrgizý.
16.00-16.30 – Tústen keıingi jeńil tamaqtandyrý.
16.30-17.30 – Tazalyq protsedýrasyn júrgizý.
19.00-19.30 – Keshki as.
19.30-21.00 – Tazalyq protsedýrasyn júrgizý.
21.00-21.30 –Keshki asqa qosymsha tamaqtandyrý.
21.30-22.00 – Uıqyǵa daıyndyq (dári berý, jýyndyrý)
22.00-07.00 – Túngi uıqy.
Olar dúısenbi saıyn balalardyń shash-tyrnaǵyn alady. Al seısenbide tárbıelerýshilerdi jýyndyryp, tósek jabdyqtaryn aýystyrady.
«Eń bastysy, balalardyń amandyǵy men densaýlyq jaǵdaıynyń ońalýy. Baıqaǵanymyzdaı, búldirshinderdiń kóńil-kúıleri jaqsy. Salmaq qosyp, dertinen saýyǵyp jatqandar da bar eken. Bul eń negizgi kórsetkish. Jańadan alynǵan jabdyqtardyń sapasy da joǵary», - dedi qoǵamdyq keńes múshesi Olga Kýzovleva.
ShQO Jumyspen qamtý jáne áleýmettik baǵdarlamalardy úılestirý basqarmasynyń basshysy Jasulan Sársebaevtyń aıtýynsha, Aıagózdegi áleýmettik ortalyqty Óskemen qalasyna kóshirý máseleni sheshpeıdi. Sebebi balalardyń barlyǵy mundaǵy tárbıeshilerdi ata-anasyndaı qabyldaıdy. Sondaı-aq túrli dıagnozy bar tárbıelenýshilerge jańa ortaǵa beıimdelý qıynǵa túspek. Al ǵımarattyń tarlyǵy tek munda ǵana emes, elimizdegi túgel derlik osyndaı mekemelerde sezilýde.
«Tórt balanyń óliminen soń ortalyqqa qatysty synı pikirler kóbeıip ketti. Onyń ishinde oryndysy da, orynsyzy da boldy. Biz árkez ashyqpyz. Kez kelgen suraqqa jaýap berýge daıynbyz. Biraq tyrnaq astynan kir izdegen durys emes. Syn obektıvti bolýy kerek. Qazir ózderińiz kórgendeı anyqtalǵan kemshilikter túzeldi. Áli de atqarar jumystarymyz az emes», - dedi ol.
Tergeý nátıjesi qandaı?
Oblystyq Polıtsııa departamentiniń Vedomstvoaralyq jedel-tergeý toby Prokýratýranyń basshylyq etýimen Balalar arnaıy áleýmettik kómek kórsetý ortalyǵynda tárbıelenýshiler ólimi boıynsha sotqa deıingi tergeý júrgizgen edi. Tergeý barysynda eksgýmatsııa jasalyp, eki komıssııalyq sot-medıtsına saraptamasy júrgizildi. Komıssııa quramyna balalar ınfektsıonısi, kardıolog, anestezıolog-reanımatolog, neırohırýrg, pedıatr, Nur-Sultan qalasynan gıstolog-sarapshylar jáne sanıtarlyq-epıdemıologııalyq baqylaý komıtetiniń mamandary qatysqan.
«Saraptama qorytyndysyna sáıkes balalardyń ólimi ókpe fıbrozy, ekijaqty irińdi bronh pnevmonııasy sııaqty janama aýrýlardyń saldarynan bolǵan. Sondaı-aq máıitterdi tekserý barysynda úsh balada dene jaraqaty anyqtaldy. Alaıda bul jaraqattardyń tárbıelenýshiler ólimine qatysy joq. Osyǵan baılanysty aýyr dene jaraqatyn alý faktisi boıynsha qylmystyq is bólek óndiriske shyǵarylyp, ary qaraı tergeý amaldary júrgizilmek», – dedi ShQO PD bastyǵynyń orynbasary Eldos Zakımov.
Onyń aıtýynsha, áleýmettik kómek kórsetý ortalyǵynda tárbıelenýshilerge tıisti medıtsınalyq kómek kórsetilmeý faktisi boıynsha qylmystyq is sotqa joldanǵan.