Aıagózde sarbazdardyń atyna 2 mln teńge nesıe alǵan komandır túrmege qamaldy
16:38, 05 Qarasha 2021
SEMEI. QazAqparat – Semeı garnızony áskerı sotynda Aıagózdegi bólimniń rota komandırine qatysty sot isi qaraldy, dep habarlaıdy QazAqparat tilshisi.
QR ІІM Shyǵys óńirlik áskerı-tergeý basqarmasynyń málimetine súıensek, aıyptalýshy uzaq ýaqyt boıy óziniń laýazymyn asyra paıdalanyp, sarbazdardyń atyna nesıe alyp kelgen.
«Tergeý barysynda anyqtalǵandaı, rota komandıri banktiń mobıldi qosymshasy jáne shaǵyn nesıe uıymdary arqyly áskerge shaqyrylǵandarǵa eki mıllıon teńgeden astam somaǵa alty nesıe resimdetken. Budan bólek, ol 17 sarbazdyń bank kartalaryn tartyp alyp, birneshe ret jalaqylaryn sheship aldy. Ofıtser sol aqshanyń barlyǵyn býkmekerlik keńsede bás tigip, utylyp qalǵan», - delingen aqpartta.
Semeı garnızony áskerı sotynyń úkimimen aıyptalýshy 3 jyl merzimge bas bostandyǵynan aıyryldy.