Avtojoldardyń sapasyn arttyrýǵa qatysty Úkimetten naqty usynystar túsken joq - M. Qazbekova

ASTANA. 5 qarasha. QazAqparat - Avtojoldardyń sapasyn arttyrýǵa qatysty Úkimetten naqty usynystar túsken joq. Bul týraly búgin Májiliste jol qozǵalystary máselesine arnalǵan zań jobasy boıynsha jumys tobynyń otyrysynda depýtat Merýert Qazbekova málim etti.

Depýtattyń pikirinshe, elimizdegi sońǵy ýaqytta kórsetkishi artyp otyrǵan jol-kólik oqıǵasynyń basty sebebi - jol sapasyna qatysty bolyp otyr. «Osyǵan oraı, el Prezıdenti Aqordadaǵy keńeıtilgen otyrysta Úkimetti, onyń ishinde Kólik jáne kommýnıkatsııa mınıstrligin jol sapasyna, Qazaqstandaǵy jol qurylysyna sapaly zamanaýı tehnologııalardy endirmeýge qatysty synǵa alǵan bolatyn. Sodan beri aıǵa jýyq ýaqyt ótti, alaıda biz osy salaǵa qatysty Úkimetten tıisti qorytyndylardy, naqty usynystardy áli kórgen emespiz. Soǵan oraı, jol sapasynyń jaqsarý perspektıvalary da joq degen sóz. Al bulaı kete berse, bunyń bári aqyr aıaǵynda joldaǵy qaýipsizdikke de, apattylyqqa da óz kesirin tıgize bereri anyq», - dedi depýtat M.Qazbekova.