120 teńgeniń sábizin 325-ten: Eki óńirde mekemeler kókónisti 2-3 ese qymbatqa satyp alyp otyrǵan

<p>Balabaqshalar men áleýmettik mekemelerge arnalǵan kókónister joǵary baǵamen jetkizilgen. Bul faktilerdi Qarjylyq monıtorıng agenttiginiń qyzmetkerleri elimizdiń eki oblysynda anyqtady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Máselen, ShQO-da erekshe qajettiligi bar balalardy qoldaý ortalyǵy 1 kg sábizdi 325 teńgeden, al qyryqqabatty 380 teńgeden jetkizgen.

QMA óńirlik departamentiniń aralasýynan keıin jetkizý tizbeginen deldal alynyp tastaldy, al kókónis baǵasy 2 eseden astam tómendetildi (sábiz 120 teńgege deıin, qyryqqabat 180 teńgege deıin).

Sonymen qatar, SQO-da jeke kásipker aýdandyq balabaqshalarǵa kókónis satatyn 50 mln teńgeden astam somaǵa bıznes uıymdastyrǵan.

Kartop bir kg 250 teńgeden jetkizilgen, al onyń saýda núktelerine satý baǵasy 43%-ǵa arzan bolǵan (141 teńgeden).

Bul kelesi jyly SQO-da azyq-túlik satyp alýda shamamen 22 mln teńgeni únemdeýge múmkindik beredi.

Júrgizilgen jumystyń nátıjesinde áleýmettik mańyzy bar azyq-túlik taýarlaryna baǵanyń kóterilýine jol bermeý boıynsha aldyn alý sharalary sheńberinde aldaǵy jylǵa arnalǵan sharttar qaıta qaraldy.

Áleýmettik azyq-túlik jıyntyǵyn jetkizý kezinde saýda ústemesi satyp alý baǵasynyń 15% aspaýy kerek.