Keńes zamanynda munaı óndirýshiler bylǵap ketken jerler tazartylyp jatyr

<p>QazMunaıGaz munaı lastaǵan jerlerdi tazalap jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

2019 jyly «QazMunaıGaz» ben QR ekologııa mınıstrligi arnaıy memorandýmǵa qol qoıǵan.

Ol boıynsha kompanııa 2024 jyldyń sońyna deıin munaımen lastanǵan jerlerdi tazalaý jáne burynnan jınalyp qalǵan munaı qaldyqtaryn ýtılızatsııalaý boıynsha mindetteme aldy.

Memorandýmdy QMG-nyń «Mańǵystaýmunaıgaz» AQ, «Ózenmunaıgaz» AQ jáne «Qarajanbasmunaı» AQ sekildi enshiles kompanııalary qoldady.

Kompanııa jerdi tazalap qana qoımaı, sonymen qatar rekýltvatsııamen aınalysady (topyraqty normatıvtik talaptarǵa deıin qalpyna keltirý).

QMG-nyń basqa da enshiles uıymdary osy jumysqa atsalysady.

«Embimunaıgaz» AQ jáne «Qazaqtúrikmunaı» JShS burynnan lastanǵan jerlerdi ýtılızatsııalaý boıynsha jumys júrgizedi.

2022 jyly olar kelisimshartta kórsetilgen aýmaqta burynnan munaımen lastanǵan jerlerdi tazalaý jumysyn aıaqtady.

QMG-nyń barlyq enshiles uıymy 2019-2022 jyldar aralyǵynda 2,2 mln tonna «tarıhı» munaı qaldyqtaryn ýtılızatsııalady, onyń ishinde:

«Ózenmunaıgaz» AQ — 976 myń tonna;
«Embimunaıgaz» AQ — 607 myń tonna;
«Mańǵystaýmunaıgaz» AQ — 453 myń tonna;
«Qarajanbasmunaı» AQ — 148 myń tonna;
«Qazaqtúrikmunaı» JShS — 28 myń tonna.

2023 jyly taǵy 639 myń tonna munaı qaldyqtaryn joıdy.

Tarıhı lastanǵan jerler — keńes zamanynda munaı óndirý barysynda paıda bolǵan túrli qaldyq túrlerin qamtıtyn ortaq ataý (burǵylaý qaldyqtary, munaı shlamy, mazýtpen bylǵanǵan topyraq, munaımen lastanǵan jerler).

Tarıhı munaı qaldyqtary úıindi túrinde nemese munaımen lastanǵan jer degendi bildiredi.