Avtosaqtandyrýda qaǵaz polıster qajet bolmaıdy

ASTANA. QazAqparat - Qazaqstanda saqtandyrý salasynda deldaldardyń sanyn azaıtý josparlanyp otyr. Bul týraly Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań  jobasyn talqylaý kezinde QR Ulttyq bankiniń tóraǵasy Danııar Aqyshev málim etti, dep habarlaıdy QazAqparat.

«Bankterde burynnan onlaın qyzmetter engizilip, sátti túrde qoldanylýda. Saqtandyrý zańnamasynyń ereksheligine baılanysty, bul salada onlaın qyzmet kórsetý tıisti deńgeıde damymaǵan. Qazaqstanda alys óńirlerde jáne aýyl aımaqtarynda qarjylyq qyzmetterdiń qoljetimdiligi árqashan mańyzdy.  Saqtandyrýdan ózge, tipti banktik ónimderge qol jetkize almaı jatqan turǵyndar týraly mysaldar óte kóp. Qarjylyq ınstıtýttardy aımaqtarda fılıaldar arqyly keńeıtý ár kezde múmkin bola bermeıdi. Bankter jáne saqtandyrý kompanııalary jeke ınstıtýttar bola otyryp, óz shyǵandaryn ońtaılandyrady. Sondyqtan da, suranys pen tabystylyq jetkiliksiz bolsa olar óńirlerde óz fılıaldarynyń sanyn azaıtady. Sondyqtan, saqtandyrýdy tsıfrlandyrý eń ońtaıly sheshim bolyp tabylady. Bul azamattarymyzǵa saqtandyrý qyzmetteriniń geografııasyn keńeıtip, barlyq áreketterdi tezdetedi», - dedi UB basshysy.

Osy oraıda Aqyshev tsıfrlandyrý, telekommýnıkatsııalarmen jáne ınternetpen qamtý barlyq salalarda júrip jatqandyqtan, bul qadamdar ońtaıly nátıje beretinin atap ótti. Halyq jáne kásiporyndar kelisimsharttardy saqtandyrý kompanııalarynyń keńsesine barmastan jáne agentterge júginbeı ınternet arqyly jasaı alady.

«Zań jobasy maquldansa, óńirlerdegi turǵyndar saqtandyrý polısin alý úshin oblys ortalyǵyna nemese deldaldarǵa barmaıdy. Deldaldardyń bolmaýy bolashaqta saqtandyrý qunyn tómendetedi. Damyǵan elderde onlaın-saqtandyrýdyń úlesi 70 paıyzǵa jetedi. Alaıda, onlaın-saqtandyrý tek zańnamalyq ózgeristerdi ǵana emes, sonymen qatar úlken jumys pen memlekettik organdardyń birlesken is-áreketin talap etedi. Qazirdiń ózinde mınıstrlikterde derek qorlaryn ıntegratsııalaý jumystary tezdetilgen. Qadaǵalaýshy organdardy tehnıkalyq jabdyqtaý da qajet bolady», - dedi Ulttyq bank tóraǵasy.

Onyń sózine qaraǵanda, avtojúrgizýshi saqtandyrý polısin saqtandyrý kompanııasynyń saıtynan onlaın-rejimde satyp ala alady. Osydan keıin klıent saqtandyrý shartyna menshiktelgen biregeı nómirdi alady.

«Nómir Biryńǵaı saqtandyrý derekqorymen beriledi. Barlyq málimetter osy derekqorda saqtalatyn bolady. Jol polıtsııasy Biryńǵaı saqtandyrý derekqorynda táýlik boıy kez kelgen ýaqytta avtojúrgizýshide saqtandyrýdyń bar-joǵyn teksere alady. ıAǵnı, qaǵaz polısti suraýdy qajet etpeıdi», - dedi ol.