Avtorlyq quqyqty buzǵandarǵa jaýapkershilik kúsheıtile me

<p>Bıyl elimizde plagıatqa qatysty 7 is qaraldy. Bul týraly Ádilet vıtse-mınıstri Botagóz Jaqselekova aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Plagıatqa qatysty aıtar bolsam, búginde avtorlyq quqyqty buzǵany úshin jaýapkershilik bar. Jaýapkershilikti qatańdatý nemese qaıta qaraý, ıaǵnı kez kelgen jaýapkershilikti iske asyrý atalǵan normany qoldaný quqyǵynyń qorytyndysy boıynsha júzege asyrylady. Bıyl 10 tulǵaǵa qatysty nebári 7 is boldy, onyń tek ekeýi ǵana plagıat faktisi. Demek, búginde jaýapkershilikti qatańdatý nemese kúsheıtý qajettiligin kórip otyrǵanymyz joq», - dedi ol Ortalyq kommýnıkatsııalar qyzmetindegi brıfıngte BAQ ókilderiniń saýalyna oraı.

Osy oraıda vıtse-mınıstr Memleket basshysy bıyl zııatkerlik menshik salasyndaǵy eki zańǵa qol qoıǵanyn atap ótti. Onyń birinshisi – «TMD-ǵa qatysýshy memleketterdiń aqparattyq-telekommýnıkatsııalyq jelilerde avtorlyq quqyq pen sabaqtas quqyqtar obektilerine quqyqtardy saqtaý jáne qorǵaý boıynsha yntymaqtastyǵy týraly kelisimdi ratıfıkatsııalaý týraly» Zań. Kelisimniń maqsaty – avtorlyq quqyq jáne sabaqtas quqyqtardy qorǵaý salasyndaǵy yntymaqtastyqty odan ári tereńdetý, Dostastyqqa qatysýshy memleketter arasyndaǵy saýda-ekonomıkalyq jáne mádenı baılanystardy keńeıtý.

Ekinshisi – «TMD-ǵa qatysýshy memleketterdiń jalǵan taýar belgileri men geografııalyq nusqaýlardy paıdalanýdyń aldyn alý jáne jolyn kesý jónindegi yntymaqtastyǵy týraly kelisimdi ratıfıkatsııalaý týraly» Zań. Kelisimde taraptarǵa jalǵan taýar belgileri men geografııalyq nusqaýlary jazylǵan taýarlardy óndirý jáne ótkizý faktileriniń aldyn alý, anyqtaý jáne jolyn kesý, sondaı-aq mundaı taýarlardy TMD-ǵa qatysýshy elderdiń memlekettik shekaralary arqyly ótkizý máseleleri boıynsha yntymaqtastyqty júzege asyrýǵa múmkindik beretin jaǵdaılar jasaý kózdelgen.