Avtoóndirýshilerdiń alańdarynda ashyq esik kúnderin ótkizemiz - Óskenbaev

NUR-SULTAN. QazAqparat – Elimizdiń mashına jasaý kásiporyndarynda kóshpeli tekserýler júrgizilip jatyr. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Sarapshylar men jurtshylyqty tarta otyryp, avtokólik quraldary men aýyl sharýashylyǵy tehnıkasyn óndirý jónindegi otandyq zaýyttardy oqshaýlaýdyń saqtalýy turǵysynan tekserýdi júrgizý» tapsyrmasy da baqylaýda. Biz Almaty, Qostanaı jáne Oralda 3 zaýytty araladyq. Memleket basshysynyń tapsyrmasyn sapaly oryndaý maqsatynda jumys komıssııasyn qurdyq. Onyń quramyna memlekettik organdar, Parlament Senaty men Májilisiniń, qoǵamdyq birlestikterdiń, buqaralyq aqparat ókilderi, sondaı-aq blogerler kirdi. Kóshpeli tekserýlerdi aqpan aıynyń sońyna deıin aıaqtaıtyn bolamyz. Avtoóndirýshilerdiń alańdarynda ashyq esik kúnderin ótkizýdi qosymsha josparlap otyrmyz», - dedi Qaıyrbek Óskenbaev.

Onyń atap ótýinshe, otandyq kásiporyndardy jergiliktendirýdi ulǵaıtý maqsatynda avtokomponentterdi óndirý boıynsha qadamdyq is-qımyl jospary ázirlendi.

«Sondaı-aq keıinnen birlesken óndiris qurý jáne ınvestıtsııalar tartý úshin sertıfıkattalǵan ónim berýshilerdi tartý máselesin pysyqtaýdamyz. Júrgizilgen jumystyń qorytyndysy boıynsha aqparat Úkimetke osy jylǵy mamyr aıyna deıin engiziletin bolady», - dedi mınıstr.