Avtonesıe baǵdarlamasyna qandaı ózgerister engiziledi

ASTANA. QazAqparat – Kólik alýǵa beriletine jeńildetilgen nesıe baǵdarlamasyna ózgerister engizilip jatyr. Onyń qorytyndysy 15 mamyrǵa deıin jarııalanady. Bul týraly Indýstrııa jáne ınfraqurylymdyq damý mınıstri Marat Qarabaev Jibek joly telearnasynyń Májilistegi mobıldi stýdııasynda bergen suhbatynda málim etti, dep habarlaıdy QazAqparat tilshisi.

«Jeńildetilgen avtonesıege qatysty ózgerister tórt bólikten turady. Buǵan deıin BAQ ókilderi avtonesıe alǵan azamattardyń aty-jóni nege jarııalanbaıtynyn suraǵan edi. Osy oraıda, alǵashqy ózgeris – endi saıtta avtonesıe alǵan azamattardyń aty-jóni jarııalanady. Árıne, klıenttiń ruqsaty arqyly. Ekinshi ózgeris, qymbat kólik satyp alýǵa shamasy jetetin avtonesıe alýshylarǵa qatysty. Mysaly, 10 mln teńge nesıe beriledi, biraq klıent 15 mln teńgeniń kóligin alǵysy keledi, demek qalǵan 5 mln-dy óz qaltasynan tóleıdi. Osy shartty ózgertkimiz kelip otyr. Qymbat kólikterdiń ornyna suranysqa ıe, halyqtyń qaltasy kótere alatyn avtomobıl markalaryn qatystyrý», - dedi Marat Qarabaev suhbat barysynda.

Mınıstrdiń aıtýynsha, kelesi ózgeris jalaqyǵa qatysty.

«Belgili bir mólsherden artyq jalaqy alatyn azamattarǵa avtonesıe bermeý. Onyń ornyna jeńildetilgen nesıeni aılyǵy shekten aspaıtyn klıentterge berýdi jón dep otyrmyz. Bul shara halyq úshin tıimdi etý maqsatynda qolǵa alynyp otyr. Endi shekti jalaqy kólemine kelsek, biz operatorǵa taldaý júrgizýdi tapsyrdyq. Aıtar bolsaq, qazaqstandyqtar negizinen qandaı kólikterdi jıi alady? Ol kólikterdiń baǵasy qansha jáne ony satyp alǵan azamattardyń jalaqysy qandaı? Taldaý júrip jatyr, sondyqtan dál qazir esep daıyn emes. Biraq, taldaýdyń nátıjesi 15 mamyrǵa deıin jarııalanady», - deıdi ol.

Sondaı-aq, vedomstvo basshysy búginde qorǵa 4 mlrd teńge jınalǵanyn, soma 5 mlrd teńgege jetkende avtonesıe baǵdarlamasy qaıta iske qosylatyny týraly aıtty.

«Nesıege ótinim berýdi onlaın etken sebebimiz – adamdar ekinshi deńgeıli bankterge baryp kezekke turdy. Sodan soń halyq arasynda sol kezektiń qanshalyqty ádil ótip jatqanyna kúmán týdy. Kúmándi joıý úshin biz onlaın júıege kóshirdik, ol jerde adam faktory múldem joq», - dep tolyqtyrdy M. Qarabaev.

Odan bólek, mınıstr halyq suranysyna qaraı aldaǵy ýaqytta avtonesıe baǵdarlamasyna taǵy da ózgerister engizilýi múmkin ekenin tilge tıek etti.