Avtomobıl joldary salasynda 130-dan astam memlekettik qyzmet kórsetilgen

NUR-SULTAN. QazAqparat - Jyl basynan beri avtomobıl joldary salasynda 130-dan astam memlekettik qyzmet kórsetildi, dep habarlaıdy QazAqparat Indýstrııa jáne ınfraqurylymdyq damý mınıstrligine silteme jasap.

2020 jyldyń qańtarynan beri «QazAvtoJol» UK» AQ oblystyq fılıaldary «Elektrondy úkimet» veb-portaly arqyly 134 memlekettik qyzmetti kórsetti.

Dálirek aıtqanda, «Syrtqy jarnama obektilerin halyqaralyq, respýblıkalyq, oblystyq jáne aýdandyq mańyzy bar jalpyǵa ortaq paıdalanylatyn avtomobıl joldarynyń bólingen beldeýinde ornalastyrýǵa ruqsat berý qujatyn tapsyrý» tarmaǵy boıynsha 37 qyzmet kórsetilgen.

Halyqaralyq jáne respýblıkalyq mańyzy bar avtojoldar arnalarmen, baılanys jáne elektr qýatyn berý júıelerimen, munaı qubyrlarymen jáne temir joldarmen, basqa da ınjenerlik jelilermen jáne kommýnıkatsııalarmen qıylysýyna ruqsat beretin memlekettik qyzmet 56 ret usynylǵan. Budan bólek, «Kirme joldardy jáne jalpyǵa ortaq paıdalanylatyn joldarǵa jalǵasatyn joldardy salýǵa kelisý» tarmaǵy boıynsha 41 memlekettik qyzmet kórsetildi.

Qazaqstanda tótenshe jaǵdaıdyń jarııalanýyna baılanysty avtomobıl joldary salasyndaǵy memlekettik qyzmetterdi kórsetý shtattyq tártipke saı júzege asyrylyp jatqandyǵyn aıta ketý kerek.

Eske salaıyq, ótken jyly «QazAvtoJol» UK» AQ 906 memlekettik qyzmet kórsetken bolatyn.