Avtomatty rejımde sýbsıdııa alýshylardyń tizilimi qalyptasady - Erbol Qarashókeev

NUR-SULTAN. QazAqparat – Qazirgi ýaqytta sýbsıdııalaýdyń biryńǵaı memlekettik aqparattyq júıesin ázirleý aıaqtalýǵa taıaý. Bul týraly QR Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Sýbsıdııalaýdyń jańa júıesiniń basty jańalyqtarynyń biri - ony tsıfrlyq formatqa kóshirý. Qazirgi ýaqytta sýbsıdııalaýdyń biryńǵaı memlekettik aqparattyq júıesin ázirleý aıaqtalýda. Onyń negizgi fýnktsıonaly avtomatty rejımde sýbsıdııa alýshylardyń tizilimin qalyptastyrý, olardyń Ekonomıkalyq qyzmet túrleriniń jalpy synyptaýyshy boıynsha aýyl sharýashylyǵy taýaryn óndirýshiler sanatyna sáıkestigin tekserý, sýbsıdııa alýshylardyń qarsy mindettemelerin tirkeý jáne olardyń oryndalý dárejesin, sýbsıdııalar alý kezektiligin ári qanaǵattandyrylmaǵan ótinimderdiń kútý paraǵyn baǵalaý bolmaq», - dedi

E. Qarashókeev Úkimet otyrysynda.

Onyń aıtýynsha, jańa júıeniń «Qoldaý» júıesinen aıyrmashylyǵy - ol fermerler úshin tegin bolady jáne barlyq negizgi memlekettik derekqorlarmen ıntegratsııalanady.

«Júıeniń barlyq is-qımyldary avtomattandyrylady, bul sýbsıdııalardy bólý jáne berý kezinde sybaılas jemqorlyq táýekelderin barynsha azaıtýǵa múmkindik beredi. Qazirgi ýaqytta biz ony Aqmola oblysynda pılottyq rejımde testileýdemiz», - dedi mınıstr.

Budan buryn habarlanǵandaı, bıyl naýryz aıynda aýyl sharýashylyǵyndaǵy sýbsıdııalaý júıesin jetildirý boıynsha túpkilikti ózgerister toptamasy Úkimettiń qaraýyna engiziledi.