Avtokólik joldaryn jóndeýge qarajat tolyq bólinbeı jatyr - senator

<p>Búgin senator Talǵat Júnisov Aqmola oblysy turǵyndarynyń avtojol qurylysy boıynsha narazylyǵy týraly depýtattyq saýal joldady, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Onda «RF shekarasy (Ekaterınbýrg) – Almaty» respýblıkalyq mańyzy bar avtojol ýchaskesin kúrdeli jóndeý týraly aıtylyp otyr.

Depýtattyń paıymynsha, joba bastapqyda 13,2 mlrd teńgege baǵalanǵan bolatyn. Jospar boıynsha 2023 jyly joldardy jóndeýge 3 mlrd teńge bólinýi tıis edi, alaıda onyń tek 1,6 mlrd teńgesi ǵana tústi. Qazir jumys kezeńin aıaqtaý úshin bul aqsha jetkiliksiz, ıaǵnı oblys turǵyndary ýaqytynda jaqsy jolǵa qol jetkize almaıtyn boldy.

«Avtomobıl joly aýdandy Aqmola oblysynyń ortalyǵymen ózara baılanystyrady jáne ol Soltústik Qazaqstan oblysy men Reseı Federatsııasy arasyndaǵy strategııalyq mańyzy bar kólik-logıstıka dálizi sanalady. Bizdiń halyqpen kezdesýlerimiz barysynda jalpy sany 2 myńǵa jýyq adam bolatyn osy jol boıynda ornalasqan birneshe aýyldyń turǵyndary joldy jóndeýdi belgilengen merzimde aıaqtaýdy talap etti. Joldardyń eskirýine baılanysty avtokólik jıi buzylady, adamdar ýaqytyly medıtsınalyq kómek ala almaıdy, shaǵyn bıznes damymaıdy», - dedi Talǵat Júnisov Premer-Mınıstrdiń birinshi orynbasary Roman Sklıardyń atyna joldaǵan saýalynda.

Depýtattyń aıtýynsha, jumystardy jalǵastyrý jáne joldy 2025 jyly iske qosý úshin 2024 jylǵa qajet qarjy somasy 10 mlrd teńgeni qurap otyr. Eger jobany tolyq iske asyrýǵa aqsha bólinbese, jobanyń qunyn qaıtadan túzetýge týra keledi, bul jobanyń qymbattaýyna ákeledi.

«Baıandalǵannyń negizinde 2024 jyly «RF shekarasy – Almaty» respýblıkalyq mańyzy bar avtomobıl jolynyń ýchaskesin kúrdeli jóndeý jobasyn aıaqtaýǵa qarajat bólý týraly, sondaı-aq respýblıkalyq bıýdjetten jyl saıyn bólinetin qarajatty ulǵaıtý máselesin sheshýdi suraımyz», - dedi senator.