Avtokólikterdiń jalǵan tranzıtinen memleketke 100 mln teńgege jýyq zalal kelgen

ASTANA. QazAqparat – Grýzııadan Ózbekstanǵa jetkizilýi tıis bolǵan 22 kóliktiń Mańǵystaý oblysynda satylyp ketýinen memleketke 100 mln teńge jýyq zalal kelgen. Bul týraly QazAqparat Memlekettik kirister komıtetine silteme jasap habarlaıdy.

Mańǵystaý oblysy boıynsha Memlekettik kirister departamentinde avtokólik quraldarynyń jalǵan tranzıt shemalary anyqtalǵan bolatyn. Bul rette memleketke keltirilgen zalaldyń aldyn ala somasy 98,8 mıllıon teńgeden astam. Tıisti sharalardy júrgizý úshin is Mańǵystaý oblysynyń ekonomıkalyq tergep-tekserý departamentine berildi. Kúdiktilerdiń kinásiniń dárejesin aıqyndaı otyryp, túpkilikti sheshim tergeý nátıjeleri boıynsha qabyldanady.

Sondaı-aq, 2019-2022 jyldar kezeńinde Qazaqstanǵa Mańǵystaý oblysynyń kedendik ótkizý pýnktileri arqyly «ýaqytsha ákelý» rásimi boıynsha on myńnan astam avtokólik quraldary ákelingen. Onyń ishinde 9 800 avtokólikte merzim ótkendigi jáne olardy EAEO-dan keri áketý mindeti júzege asyrylmaǵandyǵy anyqtaldy. Memleketke tólenbegen kedendik tólemder men salyqtar – 10 mlrd teńgeden artyq.

Komıtettiń baspasóz qyzmetinen málim etkendeı, osy faktiler boıynsha polıtsııa organdarymen tıisti birlesken jumystar, EAEO keden organdarymen aqparat almasý protsesi júrgizilip jatyr.