Avtokólik joldary salasynda úsh jańa joba iske asyrylmaq

ASTANA. QazAqparat – Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov jol salasyndaǵy jańa jobalar týraly aıtty, dep habarlaıdy QazAqparat tilshisi.

«Áleýetti jobalarǵa toqtala ketsem, jobalaý protsesinde 3 jańa joba bar. Atap aıtqanda, bul rette Oral qalasynyń ońtústik-batys aınalma jolymen «Atyraý-Oral» (521 shaqyrym, 13 ýchaske), «Jezqazǵan-Qaraǵandy» (513 shaqyrym, 12 ýchaske), sondaı-aq «Aqtóbe-Ulǵaısyn» (262 shaqyrym, 7 ýchaske) joldary qamtylyp otyr. Jobalaý jumystardy bıyl aıaqtap, qurylys-montajdaý jumystary bastalady», - dedi A. Bekov Ortalyq kommýnıkatsııalar qyzmetindegi baspasóz máslıhatynda.

Eske salsaq, byltyr Úkimet basshysy Álıhan Smaıylov «Aqtóbe-Ulǵaısyn» avtojolynyń qurylysyn qarjylandyrý tetikterin anyqtaýdy tapsyrdy.

Budan buryn habarlanǵandaı, 2023 jyldyń qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 92 paıyzǵa jáne jergilikti jeli boıynsha 87 paıyzǵa deıin jetkizilmek.

Jyl aıaǵyna deıin «Ortalyq – Ońtústik» dálizi boıynsha jol ýchaskeleri ashylady.