Avtokólik alýǵa ótinim jańa tártipppen qalaı rásimdeledi

ASTANA. QazAqparat – Ónerkásipti damytý qory kólik alýǵa jeńildikpen nesıe berý baǵdarlamasy arqyly ótinim berý tártibin túsindirdi, dep habarlaıdy QazAqparat tilshisi.

Bıylǵy 6 aqpanda saǵat 10-da «Ónerkásipti damytý qory» AQ («Qazaqstannyń Damý Banki» AQ enshiles uıymy) kólik alýǵa jeńildikpen paıyzy tómen nesıe berý baǵdarlamasy boıynsha ótinimderdi qabyldaý úshin jańa platformany iske qosady. Ótinim qabyldaý www.autonesie.kz resmı saıty arqyly júrgiziledi.

Birinshi kezekte elektrondyq tsıfrlyq qoltańba arqyly tirkelý kerek. Osydan keıin «ótinim berý» bóliminde «telefon nómiri» tarmaǵyn toltyryp, avtomobıl qurastyratyn kásiporndy tańdaý qajet. Ótinim tapsyrylǵannan keıin tańdaý jasalǵan kásiporyndy ózgertýge bolmaıdy.

Kelesi kezekte kólik alatyn adam shart talaptarymen tanysýy tıis. Osy talaptarmen kelisken jaǵdaıda, «oferta shartymen kelisemin» batyrmasyn basyp, ETsQ arqyly ótinimge qol qoıylady. Bul áreketterden keıin platformada qujattardy tekserý bastalady.

Sonymen qatar, adamdaryń ótinimderi úsh sebep boıynsha qabyldanbaýy múmkin. Birinshiden, osyǵan deıin baǵdarlama aıasynda nesıe alsa, bul adamnyń ótinimi qabyldanbaıdy. Ekinshiden, platformada osy adamnyń ótinimi buǵan deıin engizilip, qarastyrý kezeńinen ótip jatsa, jańa ótinimdi qosý múmkindigi bolmaıdy. Úshinshiden, baǵdarlamaǵa qatysyp jatqan bankte qarajat lımıti taýsylsa, ótinim qabyldanbaıdy.

Atalǵan rásimnen keıin tirkelgen ótinimdi «jeke kabınet» arqyly tekserý múmkindigi bolady.

Platforma baǵdarlamaǵa qatysatyn adamdardyń pýlyn qalyptastyrady.

Kólik alýǵa jeńildikpen nesıe berý baǵdarlamasyna «SaryarqaAvtoProm» JShS men «Hyundai Trans Kazakhstan» JShS qatysady. Jeńildetilgen nesıe alatyn adamnyń ótinimi maquldansa, bul kompanııalar 60 kún ishinde avtokólikti jetkizýi tıis.

Jalpy, avtokólik pen nesıeni berýdiń tolyq rásimin 60 kúnniń ishinde aıaqtaý kerek.