Avtobýs jolaqysyn tólemeıtin astanalyqtar jylyna 3-4 mlrd teńge shyǵyn ákeledi

NUR-SULTAN. QazAqparat – Astanada qoǵamdyq kólik aqysyn tólemeıtin jolaýshylardan keletin shyǵyn jylyna 3-4 mlrd teńgeni quraıdy. Atalǵan máseleni Nur-Sultan qalalyq máslıhatynyń bıýdjet, ekonomıka, ónerkásip jáne kásipkerlik máseleler jónindegi turaqty komıssııanyń tóraǵasy, máslıhat depýtaty Vladıslav Sergeev kóterdi, dep habarlaıdy QazAqparat tilshisi.

«Jolaýshylardyń qoǵamdyq kólik aqysyn tólemeýiniń saldary 30 paıyzdan astam shyǵynǵa batyryp otyr. Bul degenimiz - jylyna 3-4 mlrd teńge degen sóz. Biz qoǵamdyq kólikti sýbsıdııalaýǵa qosymsha qarjy taba almaı jatyrmyz. Myna jaqta mıllıardtap shyǵyn kelip jatyr. Buǵan sebep - júıeniń álsizdigi. Qoǵamdyq kólikte elektrondyq tólem jasaý júıesi ashyq bolýy tıis. Búkil protsess kórinip turýy tıis», - dedi Vladıslav Sergeev qalalyq máslıhattyń otyrysynda.

Osy oraıda komıssııa tóraǵasy qoǵamdyq kólik aqysyn tóleý júıesi máselesin bólek qaraýdy usynyp otyr.

«Qoǵamdyq talqylaý ótkizý kerek jáne máseleni sheshýde jurtshylyqty barynsha tartý qajet. Turǵyndarǵa yńǵaıly bolýy úshin onlaın daýys berý arqyly tańdaý jasaý múmkindigin qarastyrǵan jón. Bul - jyldan jylǵa sheshilmeı kele jatqan problema», - deıdi ol.

Buǵan deıin máslıhat otyrysynda qalalyq bıýdjet qarajatyn ıgermegen 15 laýazymdy tulǵa jaýapqa tartylǵany aıtyldy.

Odan bólek, elordada bıýdjet qyzmetkerleriniń jalaqasyna qosymsha 30%-dan 100%-ǵa deıin ústemaqy beriletini belgili boldy.