Avtobýs balalar emhanasynyń qorshaýyn buzyp ótip, áıel adamdy basyp kete jazdady

QARAǴANDY. QazAqparat – Búgin Qaraǵandy qalasynyń Prıshahtınsk aýdanynda qoǵamdyq kólik pen jeńil avto soqtyǵysty. Jol-kólik oqıǵasy saldarynan avtobýs balalar emhanasynyń qorshaýyn buzyp ótip, jaıaý ketip bara jatqan áıeldi basyp kete jazdaǵan, dep habarlaıdy QazAqparat tilshisi.

«11 tamyz saǵat 9:00-de Qaraǵandyda 23-yqsham aýdannan 22 sh/a jaqqa qaraı kele jatqan 26 jastaǵy jeńil avtokólik júrgizýshisi qarsy qozǵalys jolaǵyna shyǵyp, jolaýshylar avtobýsymen soqtyǵysqan. Jol-kólik oqıǵasy saldarynan avtobýs medıtsınalyq mekemeniń qorshaýyn qaǵyp ketti. Bul kólik quralynyń salonynda úsh jolaýshy bolǵan. Olardyń biriniń qoly jaraqattandy, oǵan medıtsınalyq kómek kórsetildi», - dep habarlady Qaraǵandy oblysy PD baspasóz qyzmetinen.

Jol-kólik oqıǵasynyń vıdeosy áleýmettik jelilerde paıda boldy. Onda qatty jyldamdyqpen kele jatqan jeńil avtokólik qarsy jolaqqa shyǵyp ketip, jolaýshylar avtobýsymen soqtyǵysqanyn kórýge bolady. Aldyn ala málimetter boıynsha jeńil kólik júrgizýshisi rólge ıe bola almaı qalǵan.

Sondaı-aq, vıdeodan oqıǵa bolǵanǵa deıin birneshe sekýnd buryn balalar emhanasynyń aýmaǵynda bir áıeldiń ótip bara jatqanyn kórýge bolady. Ony avtobýs qaǵyp ketýi múmkin edi. Áıel aman.

Qazirgi ýaqytta tártip saqshylary jol-kólik oqıǵasynyń mán-jaıyn anyqtap jatyr. Tıisti saraptamalar taǵaıyndaldy, olardyń nátıjeleri boıynsha is júrgizý sheshimi qabyldanady.

Vıdeodan alyn ǵ an kadr