Avstrııada fashızmge qarsy kúreste jandaryn pıda etken qazaqstandyq jaýyngerlerdiń rýhyna arnap memorıal ornatyldy
Jeńis kúnine oraılastyrylǵan eskertkish taqtanyń ashylý rásimi Avstrııanyń Lınts qalasynyń mańynda, Dýnaı alqabynda ornalasqan burynǵy «Maýthaýzen» kontslageriniń aýmaǵynda ótti. Bul rásimge Avstrııada tirkelgen TMD elderi ókildikteriniń basshylary, halyqaralyq uıymdardyń ókilderi, sondaı-aq antıfashıstik koalıtsııa memleketteriniń elshileri qatysty.
«Eskertkish taqtanyń, fashızmge qarsy kúreste erlikpen qaza tapqan ata-babalarymyzdyń eshqashan umytylmaıtyndyǵynyń jarqyn úlgileriniń biri bolatyndyǵyna senemiz. Óz ómirlerin Jeńis jolynda pıda etken azamattardyń rýhyna rızamyz», - dep atap kórsetti Qazaqstannyń Avstrııadaǵy elshisi Erjan Qazyhanov óz sózinde.
Dıplomatııalyq mıssııa basshysy sondaı-aq, memorıaldyq taqtany ornatýda qoldaý kórsetkeni úshin Avstrııa tarapyna alǵys bildirdi.