Avstrııada ekpe almaǵandar kem degende 600 eýro aıyppul tóleıdi
09:05, 21 Qańtar 2022
VENA. QazAqparat – Avstrııanyń Ulttyq keńesi kópshilik daýyspen eldiń búkil turǵyndary úshin kovıdke qarsy mindetti vaktsınatsııa týraly zańdy qabyldady, dep habarlaıdyy QazAqparat Euronews agenttigine silteme jasap.
Bul zańnyń kúshi 2024 jyldyń 31 qańtaryna deıin saqtalady. Osylaısha, Avstrııa - EO-da koronavırýsqa qarsy ekpe mindetti sanalatyn birinshi el bolmaq.
Naýryz aıynan bastap ekpe saldyrmaǵan el azamattary aıyppul tóleıtin bolady, onyń eń tómengi kólemi – 600 eýro.
El bıligi sondaı-aq ekpe alǵandar arasynda syılyqtar utysyn usynýdy josparlap otyr.
Lotereıanyń árbir onynshy qatysýshysy 500 eýro kólemindegi aqshalaı kýpon uta alady.
«Biz aımaqtardy tek vaktsınalaý jóninde aqparattandyrý úshin ǵana emes, sondaı-aq ekpe saldyrǵandar sany úshin yntalandyramyz. Aımaqtar men qalalar bul qarajatty óz damýyna jumsaı alady», - dep málimdedi Avstrııa kantsleri Karl Nehammer.