Avstrııa elshisiniń sybaılas jemqorlyqqa qarsy saıasatty damytýǵa qosqan úlesi zor - agenttik

NUR-SULTAN. QazAqparat - Sybaılas jemqorlyqqa qarsy is-qımyl agenttiginiń alańynda Tóraǵa Alık Shpekbaev Qazaqstan Respýblıkasyndaǵy dıplomatııalyq mıssııasynyń aıaqtalýyna baılanysty Avstrııa Respýblıkasynyń elshisi Gerhard Saılermen kezdesti, dep habarlaıdy atalǵan vedomstvonyń baspasóz qyzmeti.

Áńgime barysynda Agenttik basshysy vedomstvonyń júrgizip otyrǵan jumysy men onyń negizgi nátıjeleri, sondaı-aq Memleket basshysynyń aǵymdaǵy jyldyń 19 tamyzynda berilgen tapsyrmalary aıasynda sybaılas jemqorlyqqa qarsy bastamalar týraly aıtyp berdi.

Elshi Saıler Agenttik Tóraǵasyna nátıjeli ekijaqty yntymaqtastyq úshin alǵysyn bildirdi.

Atap aıtqanda, ol bıznes-jobalar men ınvestorlardy sybaılas jemqorlyqqa qarsy qoldaý jelisi boıynsha vedomstvo qyzmetiniń erekshe mańyzdylyǵyn atap ótti.

Sybaılas jemqorlyqqa qarsy qyzmettiń qazirgi zamanǵy qurylymy eń úzdik sheteldik modelder negizinde qurylǵandyǵy da atap ótildi. Atap aıtqanda, úlgi retinde Avstrııanyń sybaılas jemqorlyqqa qarsy federaldy bıýrosynyń (BAK) qurylymy qabyldandy, onyń qyzmeti aldyn alý, aǵartý, seriktestik, yntymaqtastyq jáne qylmystyq-quqyqtyq sharalar baǵyttary boıynsha qurylǵan.

Sonymen qatar, ol 2018 jylǵy qarashada Qazaqstannyń qarjylyq qoldaýymen Ortalyq Azııa elderi men Aýǵanstannyń jemqorlyqqa qarsy organdary úshin halyqaralyq sybaılas jemqorlyqqa qarsy akademııa (MAKA, Laksenbýrg q., Avstrııa) bazasynda trenıng ótkizilgenin atap ótti.

2019 jylǵy 2-4 qazanda Nur-Sultan qalasynda MAKA taraptary Assambleıasynyń 8-shi otyrysyn ótkizý ekijaqty yntymaqtastyqty keńeıtýge qosymsha serpin berdi, oǵan 50 el men halyqaralyq uıymdardan 130-dan astam sheteldik delegattar qatysty.

Alık Shpekbaev Saıler myrzanyń Agenttiktiń Nur-sultan qalasyndaǵy jáne BUU alańdaryndaǵy birqatar halyqaralyq is-sharalaryna avstrııalyq áriptesterin belsendi qatystyrýdaǵy róline den qoıdy.

Kezdesý sońynda tóraǵa dıplomatty sybaılas jemqorlyqqa qarsy saıasatty jetildirýge qosqan úlesi úshin vedomstvolyq medalmen marapattap, joǵaryda atalǵan bastamalar jáne avstrııalyq ýákiletti organdarmen tyǵyz yntymaqtastyq arqyly Agenttikti damytýǵa qoldaý kórsetkenin erekshe aıtyp ótti.

Taraptar eki eldiń sybaılas jemqorlyqqa qarsy vedomstvolary arasynda odan ári úzdik tájirıbemen almasý men bólisýge daıyn ekendikterin bildirdi.