Avıaotyn tapshylyǵy azamattyq avıatsııanyń damýyn tejep otyr - mınıstr

ASTANA. QazAqparat – Avıaotyn tapshylyǵy azamattyq avıatsııanyń damýyn tejep otyr. Bul týraly Úkimet otyrysynda Indýstrııa jne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Azamattyq avıatsııany damytýdyń negizgi tejegishteriniń biri – ishki naryqtaǵy avıaotynnyń tapshylyǵy jáne onyń joǵary quny. Osy sebepti otandyq áýejaılar tranzıttik kompanııalardy tartý men olarǵa qyzmet kórsetý boıynsha kórshi elderdiń áýejaılary aldynda básekege qabilettiligin joǵaltady. Bul óz kezeginde Qazaqstannyń tranzıttik áleýetine teris áser etýde», - dedi Marat Qarabaev.

Onyń atap ótýinshe, avıaotyn naryǵyndaǵy turaqsyz jaǵdaıǵa baılanysty áýekompanııalar jańa halyqaralyq reısterdi ashý qajettiligin qanaǵattandyra almaıdy.

«Otandyq munaı óńdeý zaýyttarynyń óndiristik qýaty avıaotynǵa degen qajettilikti ótemeıdi. Osyǵan baılanysty otyndy Reseı Federatsııasynan ımporttaýǵa týra keledi. Bul máseleni júıeli sheshý úshin avıaotyn óndirisiniń jyl saıynǵy kólemin ulǵaıtý qajet. Bul ishki naryqtaǵy tapshylyqty jáne ımportqa táýeldilikti joıýǵa múmkindik beredi», - dedi mınıstr.

Osyǵan deıin elimizde bıyl áýe marshrýttaryn sýbsıdııalaýǵa 7,2 mlrd teńge bólingenin jazdyq.