«Avıadarts-2016» halyqaralyq baıqaýyna áskerı ushqyshtardy irikteý bastaldy (FOTO)
Búgingi tańda «Qyzylaǵash» jáne «Qazaqstan» avıatsııalyq polıgondarynda Áskerı-áýe kúshteriniń ushqyshtary arasynda irikteý kezeńi ótkizilýde. «Qazaqstan Respýblıkasynan «Avıadarts-2016» baıqaýyna Sý-27 jáne MıG-29 joıǵyshtarynyń, Sý-25 shabýyldaǵyshynyń, sondaı-aq Mı-8 jáne Mı-17 kóliktik-jaýyngerlik tikushaqtarynyń ekıpajdary qatysady. Baıqaýǵa ushqyshtan (ekıpaj komandırinen) bastap býyn (jasaq) komandırine deıingi laýazymdardaǵy, biliktilik dárejesi 3-synyptan tómen emes jas ushqyshtar ǵana qatysatyn bolady.
Ushqyshtarymyz bul tartysty dodaǵa 2015 jyly alǵash ret qatysyp, jalpykomandalyq ekinshi oryndy ıelenip, jaqsy nátıje kórsetti. Osy jyly da ushqyshtarymyz joǵary nátıje kórsetedi dep oılaımyn», - deıdi ÁÁK-niń qolbasshysy, avıatsııa general-maıory Dáýren Qosanov.
Árbir komanda ózderiniń áýe kemelerinde óner kórsetedi. Ekeýi - negizgi (jup) jáne bireýi rezervtik. Baıqaýdy ótkizý baǵdarlamasy úsh kezeńdi qamtıdy. Baǵdar boıynsha ushý, kózben sholyp áýe barlaýyn júrgizý, pılotajdaý tehnıkasy; jerústi nysana boıynsha jaýyngerlik qoldaný, sondaı-aq úshinshi kezeń - sporttyq. Baıqaýǵa daıyndalý jáne ony ótkizý jónindegi jalpy jetekshilikke alýdy Reseı Federatsııasy Áýe-ǵaryshtyq kúshteriniń Bas qolbasshylyǵy júzege asyrady. Dúbirli doda 2016 jylǵy shildeniń 26-y men tamyzdyń 12-i aralyǵynda ushý quramyn jaýyngerlik daıarlaý jáne jattyqtyrýdyń 43-shi ortalyǵy (Rıazan q.) jáne «Dýbrovıchı» avıatsııalyq polıgonynyń (Rıazan q.) bazalarynda ótkiziledi.