Avıatsııa komıteti ushaq bıletiniń baǵasyn tómendetý úshin ne istemek

NUR-SULTAN. QazAqparat - Memleket Basshysy Qasym-Jomart Toqaev bıylǵy halyqqa joldaýynda respýblıkadaǵy avıabıletterdiń quny aspandap turǵanyn atap ótti. Qazirgi ýaqytta QR IIDM Azamattyq avıatsııa komıteti birqatar sharalardy qolǵa alyp, alǵa qoıylǵan maqsattarǵa jetý úshin tıisti is-sharalar josparyn ázirleýde. Bul jóninde mınıstrliktiń baspasóz qyzmetine silteme jasap QazAqparat habarlaıdy.

Mınıstrlik avıabılettiń ózindik quny qandaı kórsetkishterden quralatynyn aıtyp berdi. Baǵanyń edáýir bóligi avıaotynnyń qunynan shyǵady - bul shamamen 32%, sondaı-aq áýe tehnıkasyn paıdalaný, áýe kemelerin jalǵa alǵany úshin tólemder jáne taǵy basqa eleýli shyǵyndardyń da úlesi barshylyq.

«Avıatsııalyq otynǵa qatysty aıtarymyz, Qazaqstanda barlyq úsh MÓZ aıaqtalǵannan keıin, elimiz syrttan tasymaldanatyn kerosın ımportyna táýeldi bolmaı qaldy. Bul otyn baǵasynyń 95 dollarǵa deıin tómendeýine birden áser etti. Budan ári Qazaqstan baǵany tómendetý, onyń ishinde sheteldik tasymaldaýshylar úshin QQS azaıtý joldaryn izdestirýdi jalǵastyrýdy josparlap otyr» delingen habarlamada.

Komıtetke Eýropa ishindegi ushýdy mysalǵa keltire otyryp, ishki reısterge avıabıletterdiń joǵary quny týraly suraqtar jıi kelip túsýde. Alaıda, Qazaqstannyń ishki naryǵyn EO-nan aıtarlyqtaı erekshelenetin birqatar faktorlar bar. Atap aıtqanda, bul naryqtyń tyǵyzdyǵy, áýekompanııa oıynshylarynyń sany, Eýropada bizdiń elge qaraǵanda loýkosterler sanynyń edáýir artyq ekendigi, bul faktorlar salaýatty básekelestikke jáne avıabıletter qunynyń tómendeýine yqpal etedi.

«Biraq, aıta ketý kerek, Qazaqstan qalalary arasynda úlken aýmaqtar men qashyqtyqtar bar jáne Eýropaǵa qaraǵanda halyqtyń tyǵyzdyǵy tómen. Sondyqtan, kılometraj boıynsha uqsas avıamarshrýttardy taldaý kezinde mynadaı qorytyndy jasaýǵa bolady. Mysaly, Nur-Sultan-Almaty baǵyty boıynsha bılet quny 22 myń teńgeden bastalady. Parıj-Rım Eýropadaǵy qashyqtyq boıynsha uqsas baǵyt, dollarlyq balamadaǵy bılet quny eki ese asady. Árıne, EO-da ushý kezinde 30-40 mınýttan aspaıtyn qysqa baǵyttar kóp, bul soǵan sáıkes bılet baǵasyna da áser etedi» dep málim etti mınıstrlik.

Osyǵan qaramastan, kóptegen kórsetkishter boıynsha, búginde Qazaqstanda avıaushýlar basqa eldermen, atap aıtqanda Eýropa elderimen salystyrǵanda baǵa boıynsha básekege óte qabiletti.