Aýyzsý, baspana máselesi, medpersonal tapshylyǵy: Sátbaev turǵyndarynyń túıitkili

SÁTBAEV. QazAqparat – Baǵanyń ósýi, medpersonaldyń jetispeýshiligi jáne turǵyn úı problemalary – bul Qaraǵandy oblysynyń ákimi Jeńis Qasymbektiń Sátbaev qalasynda azamattardy jeke qabyldaýy kezinde kóterilgen máseleler boldy. Óńir basshysy jumys sapary barysynda qala aktıvimen, turǵyndarmen kezdesip, ashyq formatta áńgime ótkizdi, dep habarlaıdy QazAqparat tilshisi.

Kezdesýde sondaı-aq abattandyrý, ınjenerlik jelilerdiń tozýy, apatty úıler jáne áleýmettik nysandardy jóndeý máseleleri talqylandy. Búgingi tańda qala boıynsha 13 kóppáterli úı apattyq jaǵdaıda dep tanyldy.

Ótken jyly Sátbaev turǵyndary sapaly aýyz sýmen qamtamasyz etildi. Degenmen qalada áli de sheshimi tabylmaǵan máseleler jetkilikti.

Turǵyndar kommýnaldyq qyzmettiń jumysyna narazylyq bildirýde, bilikti medıtsınalyq mamandardyń tapshylyǵyna shaǵymdanýda.

Qala ákimi Asqar Ydyrysovtyń aıtýynsha, medıtsına men turǵyn úı máselelerine erekshe kóńil bólinedi.

«Qazaqmys» korporatsııasymen memorandým aıasynda osy jyldyń tamyz aıynda qalanyń tómengi bóliginde 500 kelýshige arnalǵan emhana qurylysyn bastaý josparlanýda. JSQ qazir aıaqtalý satysynda», – dep habarlady Asqar Ydyrysov.

Bıyl 56 páterlik úı salý josparlanýda. Sondaı-aq, 60 páterli tórt úıdiń qurylysyna jobalyq-smetalyq qujattama ázirlenýde. «Qazaqmys» korporatsııasy 30 páterlik JSQ ázirleýdi aıaqtaýda.

Jeńis Qasymbek árbir máseleniń mańyzdylyǵyn atap ótip, olardyń barlyǵy nazardan tys qalmaıtynyna ýáde berdi.

Jumys sapary barysynda oblys ákimi «Qazaqstan» sport kesheniniń aýmaǵynda ornalasqan sport nysandarynyń jóndelýin tekserdi.

Turǵyndardan muz saraıynyń jaı-kúıine shaǵym tústi. Ǵımarattyń ishine jóndeý jasaýǵa qarajat bólinedi.

Hokkeı korty jumys isteıdi. Biraq tońazytqysh jabdyqtaryn, shatyrdy aýystyrý qajet.

Fýtbol stadıonyna da jóndeý jumystary kerek.

«Qazaqmys» korporatsııasynyń demeýshiligimen fýtbol stadıonynyń kúmbezi qalpyna keltirildi. Búgingi tańda jumystar aıaqtaldy, sondaı-aq jasandy jabyn aýystyryldy. Jaqyn arada kalorıferler ornatylady. Bul fýtbolshylarǵa sýyq kúnderi jaıly jattyǵýǵa múmkindik beredi», – dedi Asqar Ydyrysov.

Oblys ákimi qala basshysy Asqar Ydyrysovqa jóndeý jumystaryn sozbaýdy jáne barlyǵyn qysqa merzimde aıaqtaýdy tapsyrdy.