Aýyz sýdy tartýǵa qosymsha qansha qarjy bólinedi
Mınıstrdiń aıtýynsha, ákimdiktermen birlese otyryp, sýmen jabdyqtaý jáne sýdy tartý jobalarynyń tizbesi jasaldy. Prezıdenttiń tapsyrmasy aıasynda osy salaǵa qosymsha 20 mıllıard teńge bólinetin boldy.
«Jobalardy iske asyrýdyń nátıjesinde 2025 jylǵa qaraı qala turǵyndarynyń ortalyqtandyrylǵan sýmen jabdyqtaý 100 protsentke jetetin bolady. Sondaı-aq, iri qalalardyń shetki aımaqtarynyń problemalaryn sheshý úshin jyl saıyn 30 mıllıard teńgeden 90 mıllıard teńgege deıin qarastyrylǵan. Ol qala mańyndaǵy eldi mekenderiniń ınfraqurylymyn arttyrady. Bıyl ákimdikter sýmen jabdyqtaý, sýdy tartý jáne jol qurylysy boıynsha jobalyq-smetalyq qujattardy daıyndady jáne iske asyrýǵa daıyn», - dedi R.Sklıar Úkimettiń búgingi otyrysynda.
Aıta keteıik, «Nur Otan» partııasynyń XVIII sezinde Memleket basshysy Nursultan Nazarbaev el turǵyndaryn taza aýyz sýmen qamtý jáne gazdandyrý sharalaryn kúsheıtýdi tapsyrdy. Osy maqsatta qosymsha 140 mıllıard teńge bólinedi.
«Osynyń arqasynda 2,2 mıllıon adamnyń problemasyn sheshýge bolady. Al Astana, Almaty men Shymkent sııaqty iri qalalardyń mańyndaǵy eldi mekenderdi damytýǵa 2019-2021 jyldary qosymsha 90 mıllıard teńge bólinetin bolady», - dedi N.Nazarbaev.
Budan bólek, shaǵyn jáne monoqalalardy damytýǵa jyl saıyn 10 mıllıard teńge bólinip turady. Atalǵan qarjy úsh jyl boıy beriledi. QR Ulttyq ekonomıka mınıstri Rýslan Dálenovtyń aıtýynsha, mono-shaǵyn qalalarǵa bólinetin qosymsha qarjyǵa ınjenerlik-kommýnıkatsııalyq ınfraqurylymdy damytý boıynsha 100 jobany iske asyrýǵa bolady.