Aýyz sý máselesi sheshilmedi, uńǵyma da, qudyq ta joq - aýyl turǵyny
Ashat Oralov túrli óńirlerden túsken ótinishterdi oflaın jáne onlaın formatta qarady. Turǵyndar kótergen jeke jáne júıeli sıpattaǵy máselelerdi sheshý zańnamaǵa ózgerister engizýdi talap etedi. Sonyń ishinde Svetlana Gýrbanova sýmen jabdyqtaýda ushyrasyp otyrǵan problemalary týraly jetkizdi.
«Sý máselesi sheshilmeı keledi. Uńǵyma da, qudyq ta joq, bar úmitimiz tek Nura kanalynda. Mundaǵy jaǵdaı qıyn, aýdan joıylýdyń az-aq aldynda tur. Adamdardyń kóbi bul jerden kóship ketpek, sýysyz qalaı ómir súredi? Másele ótken jyly, biz jaz boıy sýsyz otyrǵan kezde shegine jetti. Aptasyna 1-2 ret sý alyp kelip, ár úıge shamamen 200-250 lıtrden beredi. Biraq barlyǵynda birdeı sýdy uzaq ýaqyt saqtaıtyn bóshke de joq», - dedi ol.
Buǵan jaýap retinde Ekologııa mınıstrligi Sý resýrstary komıtetiniń tóraǵasy Nurlan Aldamjarov bıyl jobalyq-smetalyq qujattama ázirlenetinin, al Nura toptyq sý qubyryn jóndeýge 2023 jyly kirisetinderin jetkizdi.
Osyǵan uqsas máselemen Mańǵystaý oblysy Ońdy aýylynyń turǵyny Basshy Kóbentaev ta partııaǵa júgindi.
Batys Qazaqstan oblysy Podstepnoe aýylynyń turǵyny Baıan Tóleýtaeva óz aýylynda balalar úsh aýysymda oqýǵa májbúr ekenin alǵa tartty. «Aýylymyz Oraldan 12 shaqyrym jerde ornalasqan. Halyq sany 15 myń adamǵa jetti. Jyl saıyn 1-synypqa baratyn balalardyń sany artyp keledi. Jańa mekteptiń jobalyq-smetalyq qujattamasy daıyn, biz qurylysty barynsha jyldamdatýdy suraımyz», – dedi ol.
Óz kezeginde Qostanaı qalasynan kelgen Aıymgúl Ahmetova densaýlyq saqtaý júıesinde jumys isteıtin, biraq medıtsınalyq qyzmetkerler qataryna kirmeıtin tárbıeshilerdi pedagogtarǵa teńestirý qajet dep esepteıdi. Bul shara osy saladaǵy eńbekaqy mólsherin arttyrýǵa múmkindik beredi.
Qazaqstandyq biryńǵaı stomatologtar qaýymdastyǵynyń prezıdenti Nazym Bekturǵanova balalar men júkti áıelderge profılaktıkalyq stomatologııalyq qyzmet kórsetý boıynsha memlekettik baǵdarlama ázirleýdi usyndy.
Kókshetaý qalasynyń turǵyny Farıda Kóshenova «Baqytty otbasy» ıpotekalyq baǵdarlamasyna jetim balalar sanatyn qosýdy surady. Olar qazirgi ýaqytta bul baǵdarlama boıynsha baspana ala alamaıdy. Buǵan jaýap retinde Qurylys jáne turǵyn úı-kommýnaldyq sharýashylyq isteri komıtetiniń tóraǵasy Tımýr Qaraǵoıshın mundaı ózgerister Úkimet qaýlysymen bekitilgenin, joba qazir memlekettik organdarda kelisý satysynda ekenin atap ótti.
Pavlodarlyq kásipker Vıktor Prıahın ǵımarattardy paıdalanýǵa berý kezinde oryn alatyn keleńsizdikterge toqtaldy. «Kez kelgen nysandy paıdalanýǵa berý kezinde áleýmettik qorǵaý organy júrip-turýy shekteýli adamdar úshin yńǵaıly bolýyn qamtamasyz etý bóligine sáıkes keletini týraly deklaratsııany kelisedi. Alaıda, bul deklaratsııany kelisýdiń naqty algorıtmi men merzimi joq. Osy fýnktsııany memlekettik qyzmetter tizilimine qosyp, arnaıy standart ázirleýdi suraımyz», - dedi ol.
Almatylyq ekobelsendi Sergeı Snegırev janýarlarǵa jaýapkershilikpen qaraý týraly zań normalarynyń oryndalýyna qoǵamdyq baqylaý júrgizý jobasyn iske qosýdy usyndy.
Árbir ótinish boıynsha partııanyń Atqarýshy hatshysy birqatar naqty tapsyrma berdi. Ótinishterdiń basym bóligin Ashat Oralov jeke baqylaýyna aldy.
«AMANAT» partııasynyń XXI Sezinde Prezıdent Qasym-Jomart Toqaev qoǵamdyq qabyldaý bólmeleriniń qyzmetin jandandyrýdy tapsyrdy. «Halyq únine qulaq asatyn memleket» tujyrymdamasyn iske asyrý aıasynda, partııa bılik pen azamattar arasyndaǵy kópir bolýy tıis. Olar ádildik izdep, bizge keledi. Birde-bir ótinish nazardan tys qalmaıdy», - dep atap ótti Atqarýshy hatshy.
Aıta keteıik, «AMANAT» partııasynyń qoǵamdyq qabyldaý bólmelerine jyl basynan beri 65 myńnan astam adam júgingen. Turǵyndardy negizinen áleýmettik qamsyzdandyrý – 30%, turǵyn úı-kommýnaldyq sharýashylyq – 16%, turǵyn úımen qamtamasyz etý jáne jer ýchaskelerin bólý – 11% tolǵandyrady. Memlekettik organdardyń basshylary men túrli deńgeıdegi depýtattar 13 myńnan astam qabyldaý ótkizip, onyń barysynda 36 myń adamnyń talap-tilegi tyńdaldy.
«Mobıldik qoǵamdyq qabyldaýlar» jobasy aıasynda 4 aı ishinde partııalyqtar elimiz boıynsha 578 aýyldy aralap, 5 myńǵa jýyq azamatty qabyldady.