Aýyz sý baǵdarlamasyn «Aqbulaqpen» almastyrǵannan ne uttyq?

ASTANA. 22 qarasha. QazAqparat - Osydan on bir jyl buryn qabyldanǵan aýyz sý baǵdarlamasy aıasynda biz aýyldardyń jartysyn da jarylqaǵan joqpyz. Búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda QR Parlament Májilisiniń depýtaty Ashat Bekenov osylaı aıtty.

Halyq qalaýlysy atap kórsetkendeı, 2002 jyly «myń ólip, myń tirilgen» aýyz sý baǵdarlamasy qolǵa alynǵan bolatyn. Sol kezde ony iske asyrý maqsatynda el qazynasynan 195 mlrd. teńge bólindi. «Biraq aýyz sý sol baǵdarlamaǵa kirgen aýyldardyń jartysyna da jetken joq. Quqyq qorǵaý jáne qadaǵalaý organdary anyqtaǵandaı, atalǵan bastamaǵa bólingen qarjy tıimsiz paıdalanyp, jergilikti sheneýnikterdiń tarapynan talan-tarajǵa salyndy», - deıdi depýtat. Máselen, Aqtóbe oblysyndaǵy Hlebodarovka kenti oblys ortalyǵyna jaqyn tursa da, ol jerdiń halqy áli kúnge deıin aýyz sýǵa zárý bolyp otyr. Jalpy, Aqtóbe oblysynda ondaı 30 eldi meken bar. Oǵan qosa, 6 aýyldyń turǵyndary sýdy tasyp ishedi. Depýtattyń aıtýynsha, elimizde aýyz sý máselesiniń sheshilmeı jatýyna, kóp jaǵdaıda, sybaılas jemqorlyq sebep bolyp jatady. Konkýrstar kezinde tek bir uıymnyń múddesi ǵana eskerilgendikten, qurylys jumystary bir merdigerge beriledi. Ol bolsa, kelisimshart talaptaryn esh oryndamaıdy. Al aýdandyq qurylys jáne sáýlet bólimderi tapsyrys berýshi retinde onyń bárin qabyldap otyrady. Sóıtip, óz jumysyn sapasyz oryndaǵan merdigerlerdiń sybaılasy ekenin bildirip qoıady.

Aıta keteıik, araǵa 9 jyl salyp, ıaǵnı 2011 jyly Qazaqstanda «Aqbulaq» memlekettik baǵdarlamasy qabyldanǵan bolatyn. Alaıda onyń da biraz qarjysy talan-tarajǵa salyndy.