Aýyr halde jatqan órt sóndirýshi úshin jerlesteri qan tapsyryp jatyr

SEMEI. QazAqparat – Abaı oblysy Jarma aýdanynda qyzyl jalynnan zardap shekken Amangeldi Turlybekov úshin jerlesteri qan tapsyryp jatyr, dep habarlaıdy QazAqparat tilshisi.

Abaı oblysynyń densaýlyq saqtaý basqarmasy basshysynyń mindetin atqarýshy Marat Sandybaevtyń aıtýynsha, órtten zardap shekken Amangeldi Turlybekov Semeıdegi jedel járdem aýrýhanasynyń jansaqtaý bóliminde jatyr. Naýqastyń jaǵdaıy aýyr.

Kesheden beri órt sóndirýshi úshin jerlesteri medıtsınalyq mekemege kelip, qan ótkizip jatyr.

«Qazir bizde qan komponentteri jetkilikti mólsherde. Tapsyrǵan azamattardyń qany tek órtten zardap shekken adamǵa ǵana emes, sonymen qatar oblystyń basqa da aýrýhanalarynda emdelip jatqan kóptegen naýqastarǵa kómektesedi», - dedi Marat Sandybaev.

Onyń aıtýynsha, qandy erikti túrde tapsyrýshylarǵa arnaıy medıtsınalyq pýnkter jumys istep tur. Qan tapsyrýǵa nıeti bar turǵyndar Semeı qalasynyń qan ortalyǵyna – Sechenova kóshesi, 4 mekenjaıy boıynsha bara alady. Anyqtama telefony – 8(7222)-42-15-34.

Eske salsaq, Abaı oblysy Jarma aýdanynda 3 órt sóndirýshini kúıik shalyp, onyń bireýi kóz jumǵan.

Denesin kúıik shalǵan eki órt sóndirýshiniń biriniń jaǵdaıy aýyr.

Abaı oblysynyń ákimi Nurlan Uranhaev qaza bolǵan órt sóndirýshiniń otbasyna qajetti kómek kórsetiletinin málim etken.

Olarǵa 3 bólmeli páter beriletin boldy.