Aýyr halde jatqan «Qaırattyń» oıynshysy Arsen Býranchıev esin jıdy

ALMATY. QazAqparat - «Qaırat» fýtbol klýbynyń oıynshysy Arsen Býranchıev esin jıdy, dep habarlaıdy QazAqparat komandanyń Instagram paraqshasyna silteme jasap.

«Bizdiń oıynshyny dárigerler únemi baqylap otyratyn bolady» dep jazdy klýbtyń baspasóz qyzmeti.

Klýbtyń sheshimimen Qazaqstan OLIMPBET-Kýbogynyń 1/4 fınalyndaǵy «Qaırat» – «Atyraý» matchyna bılet satýdan túsken búkil qarajat Arsen Býranchıev pen onyń otbasyna aýdarylady.

Eske sala keteıik, match kezinde aýyr jaraqat alǵan «Qaırat» fýtbol komandasynyń oıynshysy Arsen Býranchıevke ota jasalǵanyn habarlaǵan bolatynbyz.

Keshe Almatynyń ortalyq stadıonynda ótken jergilikti «Qaırat» jáne «Aqtóbe» komandalary arasyndaǵy fýtbol matchynda Arsen Býranchıev dopqa talasqan sátte aýyr jaraqat alyp, shuǵyl túrde aýrýhanaǵa jetkizilgen.

«Qazirgi ýaqytta Arsen reanımatsııada jatyr. Onyń jaǵdaıy óte aýyr. Fýtbolshyǵa dárigerler muqııat qarap jatyr» dep habarlady klýbtyń baspasóz qyzmeti.