Aýyr atletıkadan bolashaqta Qazaqstannyń namysyn kimder qorǵaıdy

NUR-SULTAN. QazAqparat – Aýyr atletıkadan álemdik arenada Qazaqstannyń namysyn qorǵaıtyn basty úmitkerler belgili boldy, dep habarlaıdy QazAqparat tilshisi.

«Tokıo Olımpıadasynda oń nátıje kórsetken barsha sportshylardy quttyqtaımyn. Bul - úlken jaýapkershilik. Qazaqstannyń sportynda aýyr atletıkanyń orny erekshe, onyń dáleli - Azııa jáne álem chempıonattaryndaǵy bizdiń atletterdiń jetistigi. Aıtar bolsaq, 2018 jyly AQSh-ta ótken jasóspirimder arasyndaǵy álem chempıonatynda 5 birdeı sportshymyz baryp, barlyǵy da úzdik nátıje kórsetip, chempıon bolyp oralǵan edi. Sol sekildi mysaldar jetip jatyr»,- dedi aýyr atletıkadan QR Memlekettik jattyqtyrýshysy Meńdihan Tápsiruly OKQ-de onlaın ótken baspasóz máslıhatynda.

Onyń aıtýynsha, endigi ýaqytta erekshe kózge túsip, 2024 jylǵy Parıj Olımpıadasyna barady dep úmit kúttirip otyrǵan aýyr atletter barshylyq.

«Erler arasynda Bekbolat Rahat, Abylaı Áýelhanuly, Sapı Esengeldi, Nurǵıza Ádiletuly, Aqmolda Saıramkez, Anatolıı Savelev, Artem Antonov syndy sportshylarymyz el namysyn qorǵaıdy dep úmittenemiz. Al qyzdar arasynda Aızada Úmitdildá, Gúlnur Aıoraı, Aısamal Sansyzbaeva, Aısha Omarova, Rýfına Shalqarova, Olga Postýpova, Nadejda Lı, Raýshan Meshithanova sekildi álemdik jarysta des bermeıtin aýyr atletterimiz bar», - deıdi Meńdihan Tápsiruly.