Aýyr atletıkadan álem chempıonatynyń jeńimpazdary 15 myń dollardan syıaqy aldy
«Sportshylarymyz ben jattyqtyrýshylarymyzǵa úlken rahmet! Barlyqtaryńyzdy Qazaqstanda alǵash ret ótken Álem chempıonatyn sátti uıymdastyrýlaryńyzben quttyqtaımyn. Bizdiń komandanyń kóshbasshylary óte sátti óner kórsetti. Bul chempıonat jańa esimderdi ashty, Qazaqstannyń quramasyna bolashaǵy zor sportshylar qosylyp, biz taǵy bir ret aýyr atletıkadan álemdegi myqty elderdiń biri ekenimizdi dáleldedik», - dedi sporttyq jekpe-jek jáne sporttyń kúshtik túrleri konfederatsııasynyń tóraǵasy Tımýr Qulybaev. Sonymen qatar sharaǵa QR Mádenıet jáne sport mınıstri Arystanbek Muhamedıuly qatysyp, sportshylarǵa alǵysyn bildirdi. «Búgingi mereke barlyǵymyzǵa ortaq. Qazaqstannyń Kók Týyn jelbiretken adamdarǵa jáne de shákirtterin jeńiske jeteleı biletin jattyqtyrýshylarǵa alǵysym sheksiz. Sońǵy jyldary bizdiń elimizdegi sport júıeli túrde damyp keledi. Bul rette sporttyq jekpe-jek jáne sporttyń kúshtik túrleri konfederatsııasynyń jumysyn erekshe atap ótkim keledi. Chempıonattyń uıymdastyrýshylaryna da úlken rahmet!Sheteldik qonaqtar birinshiliktiń uıymdastyrylý deńgeıin joǵary baǵalady. Osynyń barlyǵy bizdiń durys baǵytta kele jatqanymyzdy dáleldeıdi», - dedi ol. Sharanyń saltanatty bóliginde birinshiliktiń altynyn jeńip alǵan Ilıa Ilın, Jasulan Qydyrbaev jáne Zúlfııa Chınshanlo syndy sportshylarǵa 15 myń dollardan aqshalaı sertıfıkattar tabystaldy. Al álemdik rekord ornatqandary úshin I.Ilın men Z.Chınshanlo qosymsha 5 myń dollardan aldy. Altyn alǵan sportshylardyń jattyqtyrýshylaryna da 10 myń dollardan syıaqy berildi. Kúmis medal alǵan Jazıra Japparqul men Vladımır Sedov 7 myń dollardan aldy. Jattyqtyrýshylary 5 myń dollarlyq sertıfıkattarmen marapattaldy.