Aýyr atletıka federatsııasy dopıng daýyna baılanysty málimdeme jasady

ASTANA. QazAqparat - Aýyr atletıka federatsııasy sportshylardyń dopıng qoldanýyna qatysty málimdeme jasady, dep habarlaıdy QazAqparat tilshisi.

«Bul dopıng baqylaýdy ishki, ıaǵnı qazaqstandyq dopıngke qarsy ortalyq júzege asyrǵanyn jáne onyń nátıjesi federatsııa úshin de, quramanyń basqa músheleri úshin de eshqandaı saldarǵa ákep soqpaıtynyn atap ótkim keledi. Alaıda, dopıng qoldanǵandarǵa qatysty sheshim WADA kodeksine jáne Halyqaralyq aýyr atletıka federatsııasynyń dopıngke qarsy erejelerine sáıkes qabyldanady», - deıdi Aýyr atletıka federatsııasynyń bas hatshysy Aldııar Nuralınov.

Sonymen qatar, ol bul jarystan tys baqylaý sportshylar qatysqan halyqaralyq starttan alty aı ótken soń qabyldanǵanyn atap ótti.

«Sondyqtan olardyń nátıjesin joıý nemese medaldardy qaıtarý máselesi týyndamaıdy. Bul ásirese Igor Sonnyń olımpıadalyq syılyǵyna qatysty erekshe atap ótkim keledi. Federatsııa dopıngtiń kez-kelgen kórinisine nóldik tózimdilik prıntsıpin ustanady. Turaqty rejımde dopıngke qarsy erejeler boıynsha habardar etý, sondaı-aq halyqaralyq jarystar qarsańynda ulttyq quramanyń barlyq múshelerin baqylaý boıynsha jumys júrgizilip jatyr. Bul, eń aldymen, halyqaralyq deńgeıde buzýshylyqtardyń aldyn alý úshin qajet, óıtkeni Olımpıada biliktilik júıesi el sportshylary 3-ten astam tártip buzǵan jaǵdaıda, búkil komandany shettetýdi qarastyrady», - deıdi Aýyr atletıka federatsııasynyń bas hatshysy.

Buǵan deıin Tokıo Olımpıadasynda qola júldeger atanǵan Igor Son 8 jylǵa sporttan shettetilgenin habarlaǵan edik.

Mádenıet jáne sport mınıstrligi Igor Sonnyń Olımpıada medali men aqshalaı syılyqtan aıyrylmaıtynyn málimdedi.

Aldaǵy ýaqytta birneshe jyl jarysqa qatysa almaıtyn aýyr atletterdiń qatarynda munan bólek taǵy 8 sportshy bar.