Aýylymnyń «boıyna qan júgirtýdi» maqsat ettim - SQO-daǵy etnoaýyl ıesi
Esil aýdany Órnek aýylynda tabıǵat aıasynda demalýdy unatatyndarǵa arnalǵan etnoaýyl jumys istep jatyr. Kásipti osy aýyldyń týmasy Aman Álmenov ashqan. Ázirge qonaqtardy qabyldaıtyn eki kıiz úıi ǵana bar kásipker bolashaqta isin keńeıtpek.
«Aýyldan eshqaıda ketpes edim, áskerden kelgesin jumysqa ornalasa almadym. 2000 jyldar bolatyn. Sodan qalaǵa ketýge májbúr boldyq. Onda tehnıkalyq qyzmet kórsetý ortalyǵyna aýla sypyrýshy bolyp jumysqa turdym. Keıin Beskól eldi mekeninde jeke tehnıkalyq qyzmet kórsetý ortalyǵymdy ashtym. 20 jyldaı eńbek etip kelemin osy kásipte. Biraq, meniń oıymnan osy jyldar boıy týǵan aýylym – Órnegim ketken emes. Tabıǵaty keremet qoı, osyny paıdalanyp, is bastaǵym keldi», - deıdi Aman Álmenov.
2018 jyly ol «Bastaý bıznes» baǵdarlamasyna qatysady. Sol jerde bıznes-jattyqtyrýshylarmen sóılese otyryp, etnoaýyl ashý jaıyndaǵy armanymen bólisedi.
«Maqsatym – qazaqtyń salt-dástúrlerin jańǵyrtý, aýylyma demalýshylardy tartyp, eldi meken boıyna «qan júgirtý» edi. Olar birden qoldady. Jergilikti ákimder de quptap, 8 ga jer berdi. Almatyǵa baryp, búkil jasaýymen eki kıiz úı satyp ákeldim.
Adamdar bul jerge tek mýzeıge kelgendeı bolmaıdy, olardyń demalýyna bar jaǵdaı jasadym. Janymyzda Esil ózeni aǵyp jatyr. Demalýshylar sýǵa túsedi, kúnge qyzdyrynady. Olardyń qaýipsizdigine eki qutqarýshymyz jaýap beredi, aýylymyzdyń jigitterin jumysqa aldym. Odan basqa taǵy bir adam jumyspen qamtý ortalyǵynyń baǵdarlamasy arqyly ákimger retinde qabyldandy. Ydys-aıaqty da túgendep qoıdym, kelgen kisiler osy jerdegi qazan-oshaqqa tamaǵyn pisirip, káýap qýyra alady. Bul jerdiń balyǵy da keremet, balyqty aýlaýǵa da bolady», - deıdi kásipker.
Órnek aýyly – tarıhy bar eldi meken. Munda Abylaıdyń serigi bolǵan Janataı degen batyr jatyr. Aýyl halqy, el azamattary at salysyp, qazir batyrǵa eskertkish ornatýdy qolǵa alǵan. Kelýshiler osyndaǵy batyrdyń mazaryna soǵyp, duǵa ete alady. Aman Álmenov Órnek aýylynyń bolashaqta Qazaqstannyń kıeli jerleri qataryna qosylatyndyǵyna senimdi.
«Jalpy, bastaǵan isimdi ári qaraı damytqym keledi. Kelesi jyly taǵy da kıiz úıler ákelip quramyn, sanyn onǵa jetkizgim keledi. Sondaı-aq, aspazdar alǵym keledi. Demalýǵa kele jatqandar aldyn ala habarlasyp, tamaqqa tapsyrys berip qoıa alady. Qysqy demalys ornyn da ashqym keledi. Qazir túrli jańa tehnologııamen salynǵan úıler bar ǵoı, jyly. Esildiń jaǵasyna qoıyp, qysqy balyq aýlaýdy uıymdastyrsam, adamdar taza aýada dem alsa, shańǵy tepse nemese atpen serýendese», - deıdi armanymen bólisken kásipker.