«Aýylym — altyn tuǵyrym» baıqaýynyń jeńimpazdary anyqtaldy

NUR-SULTAN. QazAqparat - Búgin elordada «Aýyl» halyqtyq-demokratııalyq patrıottyq partııasy uıymdastyrǵan «Aýylym — altyn tuǵyrym» dástúrli ádebı-onlaın konkýrsynyń jeńimpazdaryn marapattaý saltanaty ótti, dep habarlaıdy QazAqparat tilshisi.

Bıyl atalǵan konkýrstyń «Altyn tuǵyr» bas júldesin «Dramatýrgııa» nomınatsııasy boıynsha jazýshy-dramatýrg Tóken Áljantegi jeńip aldy. Jeńimpaz úsh nomınatsııa boıynsha 1 oryndy jeńip alǵan qalamgerlerdiń arasynan qazylar alqasynyń sheshimimen anyqtaldy.

«Poezııa janry - jetekshi janr. Qazaq degen aqyn halyq. Bıylǵy baıqaýda Esenǵalı aǵamyzdyń «Áıelden aqyn shyqpaıdy» degen sózi eskirgenin uqtyrǵan aqyn qyzdarymyz boldy. Aqyn qyzdarymyzdyń qadamy qutty bolsyn! Kez kelgen aýyldan shyqqan azamattyń aýylǵa degen saǵynyshy zor. «Aýyl» partııasynyń osy taqyrypta baıqaý uıymdastyrý sebebi - aýyldaǵy máseleni kóterý. Bul jerde aýylǵa degen saǵynysh qana emes, aýyldaǵy túıitkildi máseleler de kóterilýi kerek», - deıdi Qazaqstan Jazýshylar odaǵy Nur-Sultan qalasyndaǵy fılıalynyń tóraǵasy, aqyn, qazylar alqasynyń múshesi Dáýletkereı Kápuly.

Baıqaýǵa qatysqan 207 qalamgerdiń arasynan «Poezııa» atalymy boıynsha 1-oryndy Raýan Qabıdoldın ıelense, 2-orynǵa Jadyra Baıbulanova, 3-orynǵa aqyn Álibek Shegebaı laıyq dep tanyldy.

Sondaı-aq atalǵan nomınatsııa boıynsha Keńshilik Myrzabekov atyndaǵy arnaıy júldemen - Juldyz Іlebaeva, Nurlan Máýkenuly atyndaǵy arnaıy júldemen - Dana Isaǵulqyzy, Serik Qapshyqbaıuly atyndaǵy arnaıy júldemen - Árbıbek Daýlı, Qanybek Sarybaev atyndaǵy arnaıy júldemen - Asylbek Jańbyrbaı, «Aýyl» partııasynyń arnaıy júldesimen - Janat Boqashuly marapattaldy.