Aýylǵa jumysqa baratyn dárigerlerge 2 mln teńgege deıin kómek beriledi
«Mınıstrlik jergilikti atqarýshy organdarmen birlesip tıisti jumysty josparly túrde júrgizip jatyr. Birinshiden, medıtsına kadrlaryn aýylǵa tartý úshin túlekterdiń mindetti túrde 3 jyldyq jumys isteý normasy qabyldandy. Kelgen árbir dárigerge 1 mıllıon teńgeden 2 mıllıon teńgege deıin kóterme járdemaqy bólinedi. Al keıbir ákimdikter, ıaǵnı Soltústik Qazaqstan jáne Qostanaı oblystarynda úsh-bes mıllıonǵa deıin járdemaqy bóledi», - dedi A. Ǵınııat aýyldaǵy densaýlyq saqtaý máselesin talqalýǵa arnalǵan Úkimet saǵatynda.
Osy oraıda ol áli de aýylǵa baratyn dárigerlerdi áleýmettik jaǵynan qoldaýdy kúsheıtý kerek ekenin aıtty.
«Jyl saıyn klınıkalyq beıindegi 1500 medıtsına kadryn daıarlaýǵa memlekettik bilim berý tapsyrysy, granttar bólinedi. túlekterdi bólý júzege asyrylady. Búginde aýyldyq jerlerde 67 myńnan astam medıtsına qyzmetkeri, onyń ishinde 13 myń dáriger jumys isteıdi», - dedi mınıstr.
Bul turǵyda aýyldarda dáriger jetispeıtinin naqtylady.
«Bul máseleni sheshý úshin aýylda rezıdentter mindetti praktıkadan ótý úshin «Rezıdentter aýylǵa» qanatqaqty jobasy pysyqtalyp jatyr. Olar aýylda 6 aı merzimde tájirıbeden ótýi kerek. Memleket basshysy úsh jyldyń ishinde rezıdentýraǵa beriletin granttar sanynyń jyl saıyn 70 paıyzǵa ulǵaıýyn qamtamasyz etýdi tapsyrdy. Bul qadamdar dárigerlerdi kóbirek daıyndaýǵa septigin tıgizedi», - dedi vedomstvo basshysy.
Budan buryn habarlanǵandaı, aýyldaǵy kadrlyq qamtamasyz etýge taldaý jirgizilip, 1 700-den astam medıtsına qyzmetkeriniń, onyń ishinde 1000-nan astam dárigerdiń tapshylyǵy anyqtaldy.