Aýylǵa memleketke áriptes bolatyn «jer ıesi» kerek – Qumar Aqsaqalov
SQO aýyl sharýashylyǵy basqarmasynyń alqa otyrysyna óńir basshysy Qumar Aqsaqalov qatysty. Oblys ákimi karantın men qurǵaqshylyqqa qaramastan dıqanshylardyń jaqsy ónim alǵanyn aıtty. Búgin aýyl aımaqtaryn damytý agroónerkásip keshenimen tikeleı baılanysty. ıAǵnı oblys halqynyń jartysynan astamy turatyn aýyldaǵy ómir súrý deńgeıin jaqsartý – óte mańyzdy jumys.
«Memleket óz tarapynan jan-jaqty qoldaý kórsetip jatyr. Sońǵy 5 jylda oblysta aýyl sharýashylyǵyna bıýdjetten bólinetin qarajat 2,5 esege ósti. Sonyń nátıjesinde ónim óndirý 1,8 esege ulǵaıdy. Bizdiń negizgi mindetimiz – aýyl sharýashylyǵynan maksımaldy qaıtarymǵa qol jetkizý», - dedi Qumar Aqsaqalov.
Óńir basshysynyń aıtýynsha, búginde aýylǵa óz qaltasyn toltyrýdy ǵana oılamaı, senip tapsyrylǵan aýmaqty damytýda memleketke áriptes bolatyn «jer ıesi» qajet.
«Aýyldaǵy turmysty jaqsartýǵa memleket tarapynan qandaı jumys atqaryldy? Sońǵy tórt jylda 199 aýyl mektebi, 51 mádenı nysan, 46 medıtsınalyq mekeme, 2 myńǵa jýyq jol jóndelip, 150 myńnan tastam turǵyny bar 165 eldi mekenge taza sý keldi. Bul jumys bıyl da jalǵasady. Birer kún buryn ǵana Memleket basshysy Qasym-Jomart Toqaev otandyq bıznestiń ókilderimen, sonyń ishinde bizdiń oblystyń ókilderimen de kezdesti. Prezıdent óz sózinde jańa ekonomıkalyq saıasatta kásipkerlerdiń áleýmettik jaýapkershiligi basty qaǵıdattardyń biri bolatynyn atap aıtty. Sondyqtan aýyl sharýashylyǵy qurylymdary basshylarynyń jumysyn onyń qanshalyqty áleýmettik baǵdarlanǵanyna jáne «aýylda jer ıesi» bola alǵandyǵyna qarap baǵalaımyz», - dedi oblys ákimi.
Búginde ákimdikke azamattardan túsetin ótinish-shaǵymdardyń 32 %-y aýyl sharýashylyǵy jáne jer qatynastary máselelerine qatysty.
«Memleket óz tarapynan aýyl sharýashylyǵy taýaryn óndirýshilerdi sýbsıdııalarmen qoldaıdy. 2019 jyly 32,4 mlrd teńge sýbsıdııa, 10,8 mlrd teńge salyq túsken. 2020 jyly 42,8 mlrd teńge sýbsıdııa berilse, 12,3 mlrd teńge salyq salyndy. Soǵan qaramastan kásipkerler aýyldardy áleýmettik damytýǵa jetkilikti deńgeıde kóńil bólmeı otyr. Aýyldy damytý – memleket pen aýyl sharýashylyǵy taýaryn óndirýshilerdiń ortaq maqsaty. Aýyl sharýashylyǵy taýaryn óndirýshilerdiń jaýapkershiligin, onyń ishinde áleýmettik jaýapkershilikti zańnamalyq deńgeıde kúsheıtý qajettiligi týyndady. Biz qoldanystaǵy zańnamaǵa «naqty» ózgerister engizý boıynsha usynystar ázirledik. Bizdiń barlyq usynystarymyz mindetti túrde respýblıka basshylyǵyna joldanatyn bolady», - dedi Qumar Aqsaqalov.