Aýyldyń ahýalyna basa nazar aýdarý qajet – Memleket basshysy
«Aýyldyń ahýalyna basa nazar aýdarý qajet. Meniń tapsyrmam boıynsha Jambyl oblysynda aýyl turǵyndarynyń tabysyn arttyrý jónindegi pılottyq joba júzege asyryldy. Nátıjesi jaman emes. Aýyl sharýashylyǵy ónimin óndirý 2 esege artty. Mal basy 24 paıyzǵa ósti. Jumyssyzdar, ataýly áleýmettik kómek alatyndar, tirkelmeı ózin ózi jumyspen qamtyǵandar sany azaıdy. Úkimet bul jobanyń aýqymyn keńeıtý múmkindigin qarastyrý kerek», - dedi QR Prezıdenti Úkimettiń keńeıtilgen otyrysy barysynda.
Memleket basshysy tabyssyz qalǵan azamattarymyzdy qoldaý maqsatymen «Jumyspen Qamtý jol kartasy qabyldanǵanyn atap ótti.
«Bul baǵdarlamaǵa trıllıondap qarjy jumsaldy. «Jumyspen qamtý» jol kartasyn júzege asyrý barysynda birqatar kemshilikter boldy. Bul týraly men ótken jıynda atap kórsettim. Soǵan qaramastan biz bıyl ákimderdiń ótinishi boıynsha jobany jalǵastyrýdy uıǵardyq. Úkimetke oblys ákimderimen birlesip, jobalardy sapaly túrde júzege asyrýdy tapsyramyn. Byltyrǵy qatelikterdi qaıtalaýǵa bolmaıdy», - dedi Qasym-Jomart Toqaev.