Aýyldyqtarǵa STEM bilim alýǵa kómektesken belsendi jas Obama qorynyń tuńǵysh qazaqstandyq stıpendıaty atandy
Dınara Áýelbekova 2021 jyly «Girls Power Fund» qoryn quryp, Qazaqstannyń aýyldyq jerlerindegi jas áıelderge STEM bilim alýǵa kómektese bastady. Osy ýaqyt ishinde 700-den astam joǵary synyp oqýshylary men jas áıelder kodtaý, veb-ázirleý jáne jobalardy daıyndaý boıynsha praktıkalyq tájirıbe aldy.
Jobalar negizinde oqytý ádisnamasyn paıdalana otyryp, atalǵan uıym ǵylym, tehnologııa, ınjenerııa jáne matematıka (STEM) salasynda tehnıkalyq jáne kóshbasshylyq daǵdylardy damytýǵa baǵyttalǵan 20 mamandandyrylǵan baǵdarlama ótkizdi. Oqý josparyn ázirleý kezinde baǵdarlamaǵa qatysýshylardyń múddeleri, umtylystary men qajettilikteri eskerildi. Sondaı-aq, kóptegen jas áıelder qashyqtyqtan oqytýdy bala kútimi mindetterimen birge alyp júrýge májbúr bolǵan COVID-19 pandemııasy kezinde tegin repetıtorlyq baǵdarlama iske qosyldy.
Dınara Áýelbekova Nazarbaev ýnıversıtetiniń ekonomıka boıynsha bakalavrıatyn bitirgen jáne Jeneva bıznes mektebiniń halyqaralyq menedjment salasyndaǵy iskerlik ákimshilendirý magıstri dárejesine ıe. Ol sondaı-aq, «Eýrazııa» qorymen, Qazaqstandaǵy BUUDB jáne Germanııanyń syrtqy mádenı baılanystar ınstıtýtymen birlesip jobalardy basqarý boıynsha halyqaralyq keńesshi retinde jumys isteıdi.
Aıta ketsek, «Obama Qorynyń stıpendıattary» baǵdarlamasy (The Obama Foundation Scholars program) óz qyzmetinde belgili bir nátıjelerge qol jetkizgen bolashaq kóshbasshylarǵa akademııalyq jáne praktıkalyq oqytýdy biriktiretin tereńdetilgen oqý baǵdarlamasynyń arqasynda jańa deńgeıge shyǵýǵa, problemalardy sheshýdiń jańa quraldaryna qol jetkizýge jáne áleýmettik sheńberdi keńeıtýge múmkindik beredi.