Aýyldyq okrýgterge qandaı salyq túri beriledi

ASTANA. QazAqparat – Ulttyq ekonomıka vıtse-mınıstri Azamat Ámrın aldaǵy ýaqytta tórtinshi deńgeıli bıýdjetke qandaı salyq túri berilýi múmkin ekenin aıtty, dep habarlaıdy QazAqparat tilshisi.

2020 jyly respýblıkalyq bıýdjetten korporatıvtik tabys salyǵyn berdik. Qazirgi ýaqytta 1,3 myń iri kompanııa respýblıkalyq bıýdjetke, al qalǵandary jergilikti bıýdjetke tóleıdi. Bul salyqty bergen kezde onyń somasy 380 mlrd teńge bolatyn. Al ótken jyly 1,1 trln teńge jınadyq, ıaǵnı atalǵan is-sharanyń tıimdiligi kórinip tur, - dedi Azamat Ámrın Úkimet otyrysynan keıingi brıfıngte.

Onyń atap ótýinshe, aldaǵy ýaqytta tórtinshi deńgeıli bıýdjetke paıdaly qazbalardy óndirý salyǵyn berý josparlanyp otyr.

Bul jumysty jańa Bıýdjettik kodeks aıasynda jalǵastyramyz. Birinshi kezekte paıdaly qazbalardy óndirýge arnalǵan salyqty bergimiz keledi. Jer qoınaýy týraly kodekste salyq tóleýshi qandaı da bir ken ornyn ıgergisi kelgende jalpy jınalys ótkizý tıistigi kózdelgen norma bar. Jınalys barysynda turǵyndar shań-tozań turyp, qandaı da qolaısyzdyqty sezinetindigin aıtýy múmkin. Sondyqtan, olar da salyqtyń paıdasy qandaılyǵyn sezinýi tıis. Osyǵan oraı, tórtinshi deńgeıge (aýyldyq okrýgterge - red.) salyqty beremiz, - dedi vıtse-mınıstr.