Aýyldyq okrýgter bıýdjetiniń qarjylyq múmkindikteri keńeıtiledi – Álıhan Smaıylov

NUR-SULTAN. QazAqparat – Jergilikti ózin-ózi basqarýdyń jańa tujyrymdamasy ázirlenedi. Bul týraly QR Premer-Mınıstriniń birinshi orynbasary Álıhan Smaıylov aıtty, dep habarlaıdy QazAqparat tilshisi.

«Eldiń teńgerimdi óńirlik damýynyń jańa ádisteri jasalatyn bolady. Ol árbir naqty óńirdiń básekege qabilettilik basymdyǵyn ashý sharalaryn da qamtıdy. Bul úshin 2030 jylǵa deıingi aýmaqtyq-keńistiktik damýdyń boljamdy syzbasyna tıisti ózgertýler engiziletin bolady», - dedi birinshi vıtse-premer Úkimet úıindegi baspasóz máslıhatynda.

Onyń atap ótýinshe, aýyldardaǵy ózekti ınfraqurylymdyq máselelerdi sheshýge baǵyttalǵan «Aýyl el besigi» jobasyn júzege asyrý jalǵasyn tabady.

«Jergilikti ózin-ózi basqarýdy jetildirý jáne «halyq qatysatyn bıýdjetterdi» damytý aıasynda aýyldyq okrýgter bıýdjetiniń qarjylyq múmkindikteri keńeıtiledi. Jergilikti ózin-ózi basqarýdyń jańa tujyrymdamasy ázirlenedi. Atalǵan tujyrymdama aıasynda aýyl ákimderin tikeleı saılaýdy engizý, jergilikti memlekettik basqarýdyń múliktiń quqyǵyn jáne máslıhattardyń ókilettigin keńeıtý boıynsha usynystar ázirlenedi», - dedi Úkimet basshysynyń birinshi orynbasary.

Sóz sońynda Álıhan Smaıylov Memleket basshysynyń Joldaýynda eldiń naqty damý basymdyqtary belgilenip otyrǵandyǵyn, qoıylǵan mindetter tolyǵymen jáne ýaqtyly júzege asyrylatyndyǵyn basa aıtty.