Aýyldy damytýǵa byltyr 3,1 trln teńge jeke ınvestıtsııa bólingen

ASTANA. QazAqparat – Aýyldy damytýǵa salynǵan jeke ınvestıtsııanyń kólemi artyp keledi. Bul jaıynda Ulttyq ekonomıka mınıstri Álibek Qýantyrov Úkimet otyrysynda aıtty, dep habarlaıdy QazAqparat tilshisi.

«Aýyldardy damytýǵa bólinip jatqan memlekettik bıýdjet kóleminiń ulǵaıýy jeke ınvestıtsııalar úlesin de arttyra tústi.

2019 jyly jeke ınvestıtsııalardyń kólemi 2,5 trln teńge bolsa, 2022 jyly 3,1 trln teńge boldy», - degen mınıstr aýyldardy damytýdyń 2023-2027 jyldarǵa arnalǵan tujyrymdamasyna toqtaldy.

«Tujyrymdamada aýyl halqynyń ómir súrý sapasyn jaqsartý boıynsha «Aýyl – el besigi» baǵdarlamasyn iske asyrý, sýmen, elektrmen, gazben jabdyqtaý, shekaramańy aýmaqtarynda áleýmettik jáne ınjenerlik ınfraqurylymdy qamtý, jergilikti mańyzy bar joldardy salý, jóndeý jáne áleýmettik obektiler qurylysy boıynsha sharalar qamtylǵan», - dedi Álibek Qýantyrov.

Búgin Úkimet otyrysynda Premer-Mınıstr Álıhan Smaıylov bıyl respýblıkalyq bıýdjetten «Aýyl - el besigi» jobasyna 198 mlrd teńge bólingenin málim etti. Sondaı-aq ol ákimderge aýyldardy damytýǵa jeke ınvestıtsııalardy tartý jumysyn jedeldetýdi tapsyrdy.

Sondaı-aq Úkimet basshysy aýylǵa bólingen qarjyny ıgermegen óńirlerdi synǵa aldy.