Aýyldy damytýǵa bıyl SQO-da 7,4 mlrd teńge jumsalady
SQO ekonomıka basqarmasynyń málimetinshe, «Aýyl – el besigi» baǵdarlamasy aıasynda byltyr 5,4 mlrd teńgeniń 44 jobasy iske asyryldy. Nátıjesinde jańadan 209 jumys orny quryldy. Jalpy 85 eldi mekende turatyn 189 myńnan astam adam júrgizilgen jumystyń paıdasyn kórip jatyr.
«Aýyl – el besigi» baǵdarlamasy aıasynda oblys boıynsha 13 myń adam turatyn 2 aýylda sýmen jabdyqtaý jelileriniń 20 shaqyrymy aýystyryldy, 112 myń turǵyny bar 48 aýylda kentishilik joldardyń 290 shaqyrymy jáne 52 bilim berý nysany, 19 mádenıet jáne sport nysany, 13 densaýlyq saqtaý nysany, 4 eldi mekende elektr jáne jylý jelileriniń 10 shaqyrymy salyndy.
Ǵabıt Músirepov atyndaǵy aýdannyń ortalyǵy - Novoıshım aýylynda ortalyq qazandyqtyń qurylysy aıaqtaldy», - deıdi SQO ekonomıka basqarmasynyń basshysy Qýanyshbek Qalıjanov.
Bıyl da baǵdarlama aıasynda aýyldardy damytý úshin 46 eldi mekende 50 joba júzege aspaq. Osy maqsatqa 7,4 mlrd teńgeni jumsaý josparlanǵan. Bul 39 myńnan astam aýyl turǵynynyń turmysyn jaqsartady.
Jalpy, 2019 jyldan bastap «Aýyl - el besigi» jobasy aıasynda aýyldyq eldi mekenderdiń áleýmettik jáne ınjenerlik ınfraqurylymyn jańǵyrtý jáne damytý jónindegi is-sharalar júrgizilip jatyr. Jobanyń negizgi maqsaty – aýyl turǵyndaryn áleýmettik ıgiliktermen qamtamasyz etý jáne turmysyn jaqsartý.
2019-2021 jyldary SQO-da 62 aýyldyń kólik jáne áleýmettik ınfraqurylymyn jańǵyrtýǵa 17,2 mlrd teńge bólindi. 119 joba iske asyryldy. Jańadan 880 jumys orny quryldy.
Qazirgi ýaqytta óńirdegi 635 eldi mekenniń 307-si bolashaǵy bar sanatynda. Ondaǵy halyq sany 246 myń adamdy nemese aýyl halqynyń jalpy sanynyń 86% quraǵan.