Aýyldardyń mańynan tuşy sý izdeý jumystaryn 2023 jylǵa deıin aıaqtaý qajet
12:38, 11 Qarasha 2021
NUR-SULTAN. QazAqparat – Aýyldardyń mańynan tuşy sý izdeý jumystaryn 2023 jylǵa deıin aıaqtaý qajet. Bul týraly QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.
«Búginde jergilikti atqarýshy organdardyń jedel málimetterine sáıkes, ortalyqtandyrylǵan sýmen jabdyqtaý jelisin tartý josparlanyp otyrǵan 85 aýylda naqtylanǵan aýyz sý kózderi joq. Negizinen bul Batys Qazaqstan oblysynda. Bul óńirde 31 aýylda izdeý-barlaý jumystaryn júrgizý qajet. Mundaı jumysty Atyraý oblysynda – 19, Túrkistan oblysynda – 11 jáne Almaty oblysynda 9 aýylda júrgizý kerek», - dedi ol Májilistegi dóńgelek ústel barysynda.
Sonymen qatar onyń atap ótýinshe, keshendi blok-modýlder ornatý josparlanyp otyrǵan turǵyn sany az 170 aýylda da tuşy sý izdeý-barlaý jumystar júrgizilýi tıis.
«Tolyqtaı alǵanda, óńirlerdiń aýyz sýmen qamtylmaǵan barlyq aýylynda barlaý jumystaryn 2023 jylǵa deıin aıaqtaý qajet», - dedi birinshi vıtse-mınıstr.