Aýyldardyń derbes bıýdjetin engizý aıasynda ákimdikterge ınternet tartylýda
Ulttyq ekonomıka mınıstrliginiń aqparatyna sáıkes, osy jyldyń 18 qańtarynda Tımýr Súleımenov Májiliste aýdandyq mańyzy bar qalalar, aýyldar, kentter men aýyldyq okrýgter deńgeıinde jergilikti ózin-ózi basqarýdyń derbes bıýdjeti men kommýnaldyq menshigin engizýdi qarastyratyn zań jobasyn tanystyrdy. Depýtattar aýyl ákimderiniń qarjylyq saýattylyǵyna, ákimdikterdiń kadrlarmen, kompıýterlik qural-jabdyqtarmen jáne ınternet baılanysymen qamtamasyz etilýine nazar aýdarý qajettigin atap óte kele, zań jobasyn birinshi oqylymda maquldady. Mınıstr zań jobasynyń osy bóligi pysyqtalatynyna sendirgen edi.
«Májilistiń jalpy otyrysyndaǵy talqylaý Jergilikti ózin-ózi basqarýdyń derbes bıýdjeti men kommýnaldyq menshikti engizý jónindegi is-sharalar josparyn ýaqytyly daıyndaýǵa jeteledi», - dedi mınıstr.
Súleımenov Іs-sharalar josparyna sáıkes, memlekettik organdar men uıymdarǵa 2017 jylǵy 1 maýsymǵa deıin aýyldyq okrýgterdegi jyljymaıtyn jáne jyljymaly múlikterdiń tirkelmegen nysandaryn anyqtaýǵa, al 2017 jylǵy 31 jeltoqsanǵa deıin memlekettik organdardyń aqparattyq júıeleri men derekter bazasynyń tolyq daıyndyǵyn tekserýge, olardy ózektendirýge tapsyrma berilgenin málim etti.
Budan basqa, aýyldyq okrýgter ákimderi apparatyn ınternet baılanysymen qamtamasyz etý máselesin sheshý úshin ınternet-provaıderlermen kezdesý ótkizilgen. «Іs-sharalar josparyna sáıkes, jergilikti atqarýshy organdar 2017 jylǵy 1 qyrkúıekke deıingi merzimde aýyldyq okrýgter ákimderiniń apparatyn qajetti jyldamdyqtaǵy ınternetpen qamtamasyz etedi», - dedi Súleımenov.
Ol bıýdjetpen jáne kommýnaldyq múlikpen jumys júrgizý úshin joǵary nemese ortadan keıingi bilimi bar ekonomıkalyq, qarjylyq jáne býhgalter mamandary qajet bolatynyn atap aıtty.
«1066 aýyldyq okrýgta ekonomıkalyq, qarjylyq jáne býhgalterlik bilimi bar shtattaǵy qyzmetkerlerdiń jalpy sany 2297 birlikti quraıdy. Budan basqa, atalǵan aýyldyq okrýgterde zańgerlik bilimi bar 1093 shtattyq qyzmetker bar. Bul jergilikti jerlerdegi jetkilikti kadrlyq áleýetti kórsetedi», - dedi Súleımenov.
Munan bólek is-sharalar josparyna sáıkes, jergilikti atqarýshy organdarǵa jyl aıaǵyna deıin aýyldyq okrýgter ákimderiniń apparatyn sáıkes bilimi bar shtattyq býhgalterlermen jáne zańgerlermen qamtamasyz etý tapsyrylǵan.
Súleımenov sondaı-aq, bıýdjettik úderister men kommýnaldyq múlikti basqarý boıynsha arnaıy oqytý uıymdastyrylǵanyn eske saldy.
Mınıstrdiń málimeti boıynsha, 16 aýyldyq okrýg kompıýter quraldarymen qamtamasyz etilmegen. Oblys ákimdikterine 2017 jylǵy 1 qarashaǵa deıin bul máseleni sheshý tapsyryldy.
Súleımenov «Qazaqstan Respýblıkasynyń jergilikti ózin-ózi basqarýdy damytý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyn qaraý aıasynda barlyq daýly túzetýler sheshilgenin, memlekettik organdardyń 29 zańǵa qosymsha aktiler jobasyn ázirlegenin basa aıtty.
«Bıýdjet pen kommýnaldyq menshiktiń IV deńgeıin ýaqytyly jáne sapaly engizý jónindegi barlyq sharalar Іs-sharalar josparynda belgilengen merzimde qabyldanatyn bolady», - dedi Súleımenov.