Aýyldardy damytýǵa Samuryq-Qazynanyń múmkindigin paıdalaný kerek – Jıgýlı Daırabaev
«Elimizde barlyǵy 1 828 belsendi aýyl sharýashylyǵy ónimderin qaıta óńdeý kásiporny tirkelgen. Onyń ishinde 448-i et, 52-si jemis-jıdek pen kókónisti, 63-i ósimdik maıly daqylyn, 227-si sút ónimin, 252-si un men jarma ónimderin óndirip jatyr. Іri qara mal basynyń artýyna jáne qoldanystaǵy kásiporyndardyń jetispeýine qatysty et-sút ónimderin qaıta óńdeıtin shaǵyn ári orta kásiporyndardy salý qajet. Mysal retinde kóptegen óńirde, ıaǵnı Aqtóbe, Batys Qazaqstan, Túrkistan, Pavlodar oblystarynda mal basy josparly túrde artqan. Atalǵan ósimdi eskere otyryp, ár óńirde óńdelgen ettiń, súttiń úlesin arttyrý qajet», - dedi J. Daırabaev Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, maıly daqyl boıynsha Qazaqstandaǵy 63 kásiporynnyń jeteýin jańǵyrtý kerek. Budan bólek, ónimniń artýyna baılanysty, elimiz boıynsha kem degende 5-6 jańa kásiporyn iske qosylýy tıis. Sol sebepti, qazirgi kezde ár óńirde qaıta óńdeý klasterin qurý qajet bolyp tur. Ol úshin aımaqtyń óndiristik qýattylyǵyn arttyrý kerek. Óıtkeni fermer-sharýa ósirgen ónimin ótkizý úshin alysqa barmaýy qajet. Bul óńirdiń eksporttyq áleýetin arttyryp qana qoımaı, sonymen qatar agrarlyq sektor ókilderiniń ýaqyty men qarjysyn únemdeýge de septigin tıgizedi. Osy sebepti jergilikti bılik óńirlerdegi óndiristik qýattylyqty aıqyndap, shuǵyl túrde sheshim qabyldaýy tıis.
Sonymen qatar J. Daırabaev shekara mańyndaǵy aýdandardy qalpyna keltirý jumystaryna «Samuryq-Qazyna» AQ-nyń enshiles 279 kompanııasyn jumyldyrý kerek ekenin aıtty.
«Tapsyrma berip, ár aýylda kem degende bir aýyl sharýashylyǵy baǵytyndaǵy tolyq tsıkldi óndiris salýdy nege júktemeske? Sol aýyldardyń ınfraqurylymyn qalpyna keltirip, turǵylyqty halyq sanyn arttyrýdy qolǵa alyp, jaǵdaıdy retteý úshin kóship-qoný saıasatyn ózertý kerek. Memleket tek jumys kúshi jetispeıtin soltústik jáne shyǵys óńirlerine ǵana emes, osy shekara boıyndaǵy eldi mekenderge halyqtyń shoǵyrlanýyna da óz nazaryn aýdarý kerek», - dedi ol.