Aýyldardy damytýǵa arnalǵan qosalqy baǵdarlama iske qosyldy
Otyrysqa oblys ákimderiniń orynbasarlary, kásipkerler, aýyl sharýashylyǵy kooperatıvteriniń basshylary, memlekettik organdardyń ókilderi qatysty.
Vıtse-Premer aýyl turǵyndarynyń tabysyn arttyrý jónindegi pılottyq jobanyń arqasynda halyqtyń jumyspen qamtylý deńgeıi artyp, turǵyndardyń ortasha tabysynyń óskenin atap ótti.
«Memleket basshysy Qasym-Jomart Toqaev halyqtyń tabysyn arttyrý máselelerine erekshe nazar aýdarady. Bul baǵytta júıeli jumystar júrgizilip jatyr. Pılottyq joba óziniń tıimdiligin dáleldedi. Ol jumyspen qamtý, tabys tabýdyń jańa múmkindikterimen qatar óńirlik deńgeıde azyq-túlikpen qamtamasyz etý máselelerin de sheshedi»,— dep atap ótti Eraly Toǵjanov.
Jambyl oblysynyń ákimi Nurjan Nurjigitov pılottyq jobany iske asyrýdyń aralyq qorytyndylary týraly baıandady. Jobaǵa 2478 turǵyn qatysyp, nesıe alǵan, sondaı-aq 25 eldi mekennen 11 jańa aýyl sharýashylyǵy kooperatıvi iske qosyldy – bul oblystyń 10 aýdanynda 11 pılottyq aýyldyq okrýgtiń qyzmeti.
Jobanyń negizgi maqsaty – aýyl sharýashylyǵy taýaryn óndirýshilerdi jan-jaqty qoldaý, aýyl turǵyndaryn agrarlyq bızneske barynsha tartý, azyq-túlik qaýipsizdigi jáne azamattardyń ómir súrý sapasyn jaqsartýǵa baılanysty máselelerdi sheshý.
«Pılottyq jobanyń birinshi kezeńin júzege asyrý nátıjesinde árbir otbasynyń tabysy orta eseppen 4 esege artty. Jeke kásipkerler sany 2282-ge ósti. 589 jańa jumys orny quryldy. Ataýly áleýmettik kómek alýshylar sany 65%-ǵa, jumyssyzdar sany 36%-ǵa azaıdy. Bizdiń esepteýimiz boıynsha, jobany iske asyrýdyń bes jylynda ekonomıkalyq tıimdilik 14,9 mlrd teńgeni quraıdy», —
dedi Nurjan Nurjigitov.
Vıtse-Premer Jambyl oblysynyń oń tájirıbesin eldiń ózge aımaqtaryna keńeıtýdiń mańyzdylyǵyn atap ótti.
«Ol úshin árbir azamat ortaq iske eleýli úles qosýy qajet. Eń bastysy kez-kelgen aýyl turǵynyna qoljetimdi etip, jobalardy shaǵyn ınvestıtsııalarmen júzege asyrýǵa múmkindik berý. Osyndaı jobalar arqyly biz aýyl halqynyń tabysyn arttyramyz. Bul jobany «Aýyl amanaty« dep ataýdy usynamyz»,
— dedi Eraly Toǵjanov.
«Aýyl amanaty» qosalqy baǵdarlamasy halyqtyń tabysyn arttyrý baǵdarlamasy sheńberinde iske asyrylatyn bolady.
«Amanat» partııasynyń hatshysy Eldar Jumaǵazıev óz sózinde jobada kózdelgen maqsattarǵa qol jetkizý úshin jaqyn arada partııa janynan arnaıy jobalyq keńse qurylatynyn atap ótti. Aldymen aýyldaǵy árbir úı boıynsha statıstıkalyq derekter jınalady. Árbir eldi mekenniń geografııalyq erekshelikteri, jer máseleleri, sýmen qamtamasyz etý, eńbek jáne qarjy resýrstary eskeriledi.
Egjeı-tegjeıli taldaý aýdandarda qandaı daqyldardy ósirýge qolaıly ekenin, olardyń aýmaǵynda qandaı óndiristerdi ashýǵa bolatyndyǵyn anyqtaýǵa múmkindik beredi. Bul derekter jergilikti atqarýshy organdarǵa beriledi. Alynǵan taldaýǵa sáıkes kásipkerlermen jumys júrgiziledi.
Tehnıkalyq jáne kásiptik bilim beretin orta arnaýly kolledjderde tutynýshylardyń suranystaryna saı ónim shyǵaratyn mamandar úshin biliktilik ortalyqtaryn ashý qajet.
Vıtse-Premer statıstıkalyq eseptiliktiń jańa ádistemesin qabyldaýdy jáne árbir eldi meken, úı sharýashylyǵy, adam boıynsha aýqymdy derekter jınaýdy, sondaı-aq skrınıng júrgizip, árbir aýyl boıynsha mıkro derekter jınaqtaýdy tapsyrdy. Sondaı-aq skrınıng qorytyndylary boıynsha árbir aýyldyń, aýdannyń, oblystyń ekonomıkalyq mamandanýyn aıqyndaý, aýyl sharýashylyǵy shıkizaty retinde qaıda jáne qandaı ónimdi tıimdi ósirý kerektigin, ishki naryqtyń syıymdylyǵyn jáne eksporttyq áleýetti eskere otyryp, qandaı qaıta óńdeý jáne óndiristik qýattardy iske qosý kerektigin aıqyndaý qajet.
«Halyqtyń tabysyn arttyrý baǵdarlamasy, birinshi kezekte, aýyldyq jerlerde jumyspen qamtý deńgeıin kóterýge baǵyttalǵan. Sondyqtan kez-kelgen jobany júzege asyrý kezinde turǵyndarǵa qandaı paıda ákeletini týraly saralaý kerek. Jergilikti bıliktiń aýyl ákiminen bastap óńir basshysyna deıingi mindeti – AÓK qoldaý kórsetý, aýyl sharýashylyǵynyń oǵan jatpaıtyn túrlerin damytý boıynsha sharalar qabyldaý», — dedi Eraly Toǵjanov.
Otyrys barysynda qatysýshylar aýyl sharýashylyǵy jerleriniń tapshylyǵy máselesin sheshýge, osy salada bilikti mamandardy oqytýǵa baılanysty máselelerdi talqylady.
Keńes sońynda Eraly Toǵjanov oblys ákimdigi men ortalyq memlekettik organdarǵa «Halyq tabysyn arttyrý baǵdarlamasyn» júzege asyrý boıynsha birqatar tapsyrma berdi.
Vıtse-Premer Tarazda «Bızneske arnalǵan úkimet» ortalyǵynyń jumysymen tanysty, onda kásipkerler barlyq qajetti qyzmetterdi «bir tereze» qaǵıdaty boıynsha alady. Ortalyqta óńirlik kásipkerler palatasynyń, «Taraz» ÁKK» UK» AQ, «Taraz» jáne «Atameken» mıkroqarjy uıymdary, «Kazakh Invest» UK» AQ, ekinshi deńgeıdegi bankterdiń menedjerleri, kásipkerlerdiń quqyqtaryn qorǵaý jónindegi saraptama tobynyń ókilderi, memlekettik organdardyń qyzmetkerleri qyzmet kórsetedi.