Aýyldardy damytýǵa 200 mlrd teńge bólindi

ASTANA. QazAqparat – Damý áleýeti bar 800 aýylǵa 200 mlrd teńge bólindi. Bul týraly Májiliste eldi mekenderge arnalǵan óńirlik standarttar júıesi týraly Úkimet saǵatynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Aýyl turǵyndarynyń ómir súrý sapasyn jaqsartý baǵytynda mınıstrlik «Aýyl – El besigi» jobasyn iske asyrýdy jalǵastyryp jatyr. 2023 jyly 1,8 myń jobany iske asyrýǵa shamamen 200 mlrd teńge bólindi. Bul turǵyda damý áleýeti bar 800 aýyl qamtylǵan», - dedi Á. Qýantyrov.

Onyń aıtýynsha, bul qarajatqa turǵyn úı-kommýnaldyq sharýashylyǵynda 222 joba, 421 áleýmettik ınfraqurylym jobasy, sondaı-aq 1 168 kólik ınfraqurylymy jobasy iske asyrylyp jatyr.

«Bul rette osy baǵdarlama aıasynda oblystar boıynsha bıýdjettik ınvestıtsııalar tıimdiliginiń naqty mysaldary bar ekenin atap ótken jón. Máselen, Pavlodar oblysynyń Ertis aýdanynda 2019-2022 jyldary 5 aýyl qamtyldy, onda jalpy somasy 1,4 mlrd teńgege 25 joba iske asyryldy. Nátıjesinde, osy kezeńde aýdannyń bul aýyldaryna 7,6 mlrd teńge jeke ınvestıtsııa tartyldy. Munymen qosa, Aqtóbe oblysynyń Mártók aýdanynda «Aýyl – El besigi» jobasymen qamtylǵan 8 aýyl boıynsha 4 jyl ishinde 9 jobany iske asyrýǵa 3,1 mlrd teńge bólingen bolatyn. Osy aýyldarǵa 97 jobany iske asyrýǵa 9,5 mlrd teńge jeke ınvestıtsııa tartyldy. Bul óz kezeginde jaqsy nátıje. Osy qadamdar memlekettik ınvestıtsııalar aýyldardyń tartymdylyǵyn arttyrady jáne jeke bıznes te olardy damytýǵa ınvestıtsııa sala bastaıdy», - dedi mınıstr.

Budan buryn habarlanǵandaı, Óńirlik standarttar júıesin ózgeris engizilip, jańa redaktsııada nysandar men kórsetiletin qyzmetterdiń tizbesi aıtarlyqtaı keńeıtildi.

2023 jyly óńirlerdiń ınjenerlik jáne kólik ınfraqurylymyn damytý úshin 14 oblys ortalyǵynda 67 bıýdjettik ınvestıtsııalyq jobany iske asyrýǵa 42,1 mlrd teńge bólindi.