Aýyldardy aýyz sýmen qamtýǵa jyl saıyn 100 mlrd teńgeden bólinedi

ASTANA. QazAqparat - Aýyldyq eldi mekenderdi aýyz sýmen qamtýǵa jyl saıyn 100 mlrd teńgeden bólinedi. Bul týraly búgin Úkimet úıinde ótken baspasóz máslıhatynda QR IDM Qurylys jáne turǵyn úı-kommýnaldyq sharýashylyǵy isteri komıteti tóraǵasynyń orynbasary Beıbit Shahanov aıtty.

«Memleket basshysynyń tapsyrmasyn oryndaý aıasynda aýyldyq eldi mekenderdi sýmen jabdyqtaý júıesin qarjylandyrýdy barlyq qarjy kózderi arqyly jylyna 100 mlrd teńgege deıin arttyrý josparlanyp otyr. Bul sektordyń damýy qarqynyn arttyrýǵa jáne eldi mekenderdiń basym bóligin sapaly aýyz sýmen qamtamasyz etýge múmkindik beredi», - dedi ol.

Jalpy tóraǵa orynbasarynyń sózine qaraǵanda, 2018 jyly eldi mekenderdi  aýyz sýmen qamtamasyz etý baǵytynda 193 jobany júzege asyrýǵa 67,9 mlrd teńge kózdelgen. Bul 2017 jylǵy qarjy kóleminen 17,6 paıyzǵa artyq. Júrgizilgen jumystardyń nátıjesinde aýyldyq eldi mekenderdiń 59, al qalalardyń 94 paıyzynyń turǵyndary ortalyqtandyrylǵan aýyz sýmen jabdyqtaý júıesine qol jetkizetin bolady.

Aıta keterligi, 2017 jyly sýmen jabdyqtaý júıesin damytýǵa respýblıkalyq bıýdjetten 55,8 mlrd teńge bólinip, 164 joba qolǵa alyndy.

«Sonyń arqasynda 2700 shaqyrym jeli salynyp, qaıta jóndeldi. Nátıjesinde  184 myń adam ortalyqtandyrylǵan sýmen jabdyqtaý jelisimen qamtyldy. Bul rette qalalardyń 93,8, al aýyldardyń 57,4 paıyzy ortalyqtandyrylǵan sýmen jabdyqtaý júıesine qol jetkizdi», - dedi Beıbit Shahanov.