Aýyldardaǵy kásiptik kolledj stýdentteri dástúrli formatta oqıdy
«Aýyldy jerlerde jáne shaǵyn qalalarda ornalasqan 97 kolledj óz stýdentteri úshin oqýdy dástúrli formatta uıymdastyrady. Sondaı-aq QR ІІM men QR QM janyndaǵy 14 kolledjdiń stýdentteri oqý oryndarynda oqıdy. Qalǵan kolledjderde birinshi kýrs stýdentteri úshin, atap aıtsaq stýdentteriniń jalpy sanynyń shamamen 31%-y úshin oqytý aralas formatta uıymdastyrylady», - dedi Bilim jáne ǵylym vıtse-mınıstri Sholpan Karınova OKQ-da ótken baspasóz máslıhatynda.
Onyń aıtýynsha birinshi kýrs stýdentteri úshin barlyq sanıtarlyq-epıdemıologııalyq talaptardy saqtaı otyryp, oqytý pánderiniń 70%-y dástúrli formatta jáne 30%-y qashyqtan ótkiziledi. TjKB uıymy oqý jumys josparlaryna sáıkes shtattyq jáne qashyqtan oqytý formattarynda oqytýdy ótkizý úshin pánder tizbesin derbes aıqyndaıdy.
«Aýdıtorııalyq sabaqtardyń uzaqtyǵy 45 mınýttan aspaıdy, kolledj ákimshiligi ıkemdi keste qurady. Kabınetterde úzilister arasynda jáne sabaqtan soń sanıtarlyq tazalaý jumystary júrgiziledi. 2-4 kýrs stýdentteri aralas formatta oqıdy. Tehnıkalyq, tehnologııalyq, agrarlyq baǵyttar boıynsha oqıtyn stýdentter úshin sabaqtar qashyqtan, zerthanalyq jáne praktıkalyq sabaqtar, óndiristik oqytý jáne kásiptik praktıka dástúrli formatta uıymdastyrylatyn bolady. Qorytyndy attestattaý da shtattyq rejımde ótedi», - dedi ol.