Aýyldarda memlekettik mal dárigeri shtaty qaıta qurylady - AShM

ASTANA. 6 mamyr. QazAqparat - Respýblıkanyń aýdan ortalyqtarynda jáne aýyldyq eldi mekenderde dáriger-lıtsenzıattardyń ornyna memlekettik mal dárigerleriniń shtattyq birlikteri qaıta qurylady, dep habarlady primeminister.kz saıtyna suhbat bergen QR Aýyl sharýashylyǵy vıtse-mınıstri Gúlmıra Isaeva.

«Birneshe jyl buryn veterınarlyq qyzmetti básekege qabiletti ortaǵa berý týraly sheshim qabyldanyp, dáriger-lıtsenzıattar paıda boldy. Taldaý júrgizilip, onyń qate ekenin túsindik - shaǵyn bıznes aýrýlardyń taralýyna jaýapkershilkti óz moınyna ala almaıdy. Búgingi tańda veterınarııadaǵy eń jaqsy keńestik tájirıbeni eske túsirip, oryndarda veterınarlyq qyzmetti qaıta qalpyna keltirý týraly sheshim qabyldadyq», - dedi G.Isaeva.

Vıtse-mınıstrdiń aıtýynsha, aýdan ortalyqtarynda búgin kommýnaldyq memlekettik veterınarlyq kásiporyndar qurylǵan, olarǵa 196 aýdandyq vetstansy jáne 2 myńnan astam vetpýnkt tıesili.

«Ár eldi mekende memlekettik mal dárigeri bolady, ol memleketten jalaqy alyp otyrady. Vaktsınatsııany, mal basy sanyn esepke alýdy da, synama irikteýdi de ózi júrgizip, bekitilgen talaptar men standarttarǵa sáıkes qyzmetterdiń barlyq túrlerin oryndaıdy. Memleket óz aldyna ony ustaýǵa qarajat bóledi, arnaıy jabdyqtalǵan avtokólik, bırkalardy skanerleýge arnalǵan apparattar, prınterler, medıtsınalyq preparattar, jeke ǵıamarat usynady», - dep túsindirdi vedomstvo basshysynyń orynbasary.

Sońǵy jyldary aýyldyq jerlerde konkýrstyq negizde jeke mal dárigerlerin tartý is-tájirıbesi ózin múlde aqtaǵan joq, tek zııandylyǵyn kórsetti - maldyń epızootııalyq saýlyǵy kórsetkishi nasharlady, shalǵaıdaǵy aýyldardyń deni veterınarlyq is-sharalarmen qamtylǵan joq, bólingen qarajat baqylaýsyz jumsaldy, dep atap ótti Aýyl sharýashylyǵy mınıstrliginiń ókili.

G.Isaevanyń aıtýynsha, qazirgi ýaqytta Qazaqstan HEB-pen (Halyqaralyq epızootııalyq bıýro) ózara qatynasty jandandyryp, Bıýronyń ádistemese, qujattamasy, jumys syzbasy basshylyqqa alyndy. Bul ásirese DSU-na kirý aldynda ózekti másele, onda bizge dúnıejúzilik qaýymdastyqqa yqpaldasýǵa, zańnama men standarttardy, onyń ishinde veterınarııany da sáıkestendirýge týra keledi.

«Eger erteńgi kúni aýylsharýashylyq ónimderin sheteldik naryqtarǵa eksporttaıtyn bolsaq, onda bizdi veterınarııa boıynsha qatań talaptar kútip tur, bul qyzmetti erterek reformalasaq, halyqaralyq uıymdardyń tolyqqandy qatysýshysy bolýǵa jáne ótkizýdiń syrtqy naryqtarynda áleýetti seriktestermen teń dıalog júrgizýge múmkindigimiz artady», - deıdi AShM basshysynyń orynbasary.